S'impignu de sa RAS po su cuncursu "Screen in Green" dedicau a argumentus ambientalis

Sa "Fondazione Sardegna Film Commission" at a cuncudrai custu cuncursu “birdi”
31 Dicembre 2021
terra

Terra - S'impignu de sa Sardigna po sa sustenibilidadi e sa defensa de s'ambienti naturali s'aunit a su sentidu de is giovunus sardus. Ddu fait cun nd'unu cuncursu po su tzìnema e po sa creatzioni de produtus audiuvisivus.

Su nòmini suu est “Screen in Green” e est unu cuncursu nàsciu de sa voluntadi de su Ministeru de sa “Tansizione Ecologica” de s'istadu italianu. Unu cuncursu, custu, chi cun “Sardegna 2030”, est a nai cun s'istrategia regionali po s'isvilupu sustenìbili, s'est cojau cun s'impignu chi sa Regioni Autònoma de Sardigna at amostau in is mesis passaus in matèria de sustenibilidadi.

terraMa ita nc'intrat sa Regioni Autònoma de Sardigna cun su chi fait su Ministeru de sa “Tansizione Ecologica”? S'acàpiu est rapresentau de sa “Fondazione Sardegna Film Commission”, chi at a sighiri e at cuncudrai custu cuncursu “birdi”.

Po sa Regioni Autònoma de Sardigna, difatis, “Screen in Green” rapresentat una faina de impignu ambientali intre is medas giai fatas e is chi s'ant a depi mandai ainnantis in su benidori. Una faina chi pertocat s'ecologia, ma puru s'imparu e sa comunicatzioni asuba de argumentus ambientalis e sustenìbilis e chi, prusetotu, pertocat is giovunus.

“Screen in Green” est difatis unu cuncursu pentzau po giovunus chi tenint de 18 a 30 annus. Custus ant a podi pigai parti a custa manifestada culturali de impignu ambientali iscriendi istòrias po su tzinema e po s'audiuvisivu. Is istòrias ant essi dedicadas feti a argumentus “birdis”.

Is categorias de su cuncursu funt 3 in totu: “Screen in Green” po film cutzus chi durant de 3 a 5 minutus; “Screen in Green” po is serie TV; “Screen in Green” po film longus.

Dognunu at a podi presentai unu progetu po una categoria feti. Su progetu at a depi èssiri iscritu in lìngua italiana e, comenti si poditi lìgiri in su bandu, s'ant a podi presentai operas de dogna tipu (comenti: noir, horror, cumèdias, documentàrius e àterus).

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags