Sostenibilidadi: “Portala nel cuore” premiada in su cuncursu de “Smartphone d’oro”

Terra – “Portala nel cuore” lompit in continenti e bincit unu prèmiu de importu mannu. Sa campagna pubblicitària istitutzionali pentzada de s’Adm, est a nai de s'“Agenzia delle Accise, Dogane e Monopoli”, cun s'agiudu de sa Regioni Autònoma de Sardigna, bincit su prèmiu ispetziali “Ambiente” in su cuncursu romanu “Smartphone d'oro” de “PAsocial”.

Is aministratzionis pùbblicas chi ant pigau parti a sa de duus editzionis de su prèmiu “Smartphone d'oro” funt istètias 61 e intre custas s'agatàt sa Sardigna puru.

Ma ita est su prèmiu “Smartphone d'oro”? Custu est unu prèmiu chi nascit cun s'idea de donai un'arrecononnoscimentu a is esperièntzias pùbblicas prus bellas in su campu de sa comunicatzioni, de s'informatzioni e de is serbìtzius chi si podint biri in su “web” e atressu de is “social”.

Una campagna importati, chi ndi bogat a pillu unu tema ambientali dilicau, est a nai s'abbitudini mala de ndi liai conchillu e arena de s'arenàrgiu.

In Firentzi, Casteddu e Terranoa, sa coperatzioni manna intre de totus is personis chi ant pigau parti a custu progetu at permìtiu de donai vida a una campagna meda importanti po sa terra de Sardigna.

Sa campagna “Portala nel cuore” tenit sa faci de tres pèrsonis famadas e acapiadas cun sa Sardigna; funt personis chi ant amostau sèmpiri una sensibilidadi manna po s'ambienti. Ma chini funt custus pessonàgius pùblicus? Seus fueddendi de Luigi Datome, Geppi Cucciari e Caterina Murino, pessonàgius pùblicus chi ant pigau parti cun impignu e amori a sa campagna po frimai sa fura de s'arena e de is àteras “prendas” de mari. Caterina Murino, Geppi Cucciari e Luigi Datome, difatis, funt istètius is protagonistas de unu progetu fatu de tres “spot” bèssius in is emitentis de sa televisioni e in s'arradiu sarda, in is social de s'Adm e de sa Regioni Autònoma de Sardigna, in unus cantu portus. aeroportus e ferrovias italianus e po finas in is “monitor” de is traghetus chi tucant e lompint in Sardigna.

Is cuàtru spot bessint totus cun is sutatìtulus in italianu e in ingresu.
 

Attività realizzata col contributo della Regione Sardegna - IMPRENTAS 2020-2021. LR 22/2018, art. 22