Sustenibilidadi: s'ammanniat sa retza “Club Friends of Maristanis”

Sa punna est amenguai su consumu de s'àcua
1 Dicembre 2021
terra

Terra - De su 30 de su mesi de onniasantu passau est crèsciu ancora su grupu de realidadis produtivas chi aderint a su “Club Friends of Maristanis”, una retza de ristorantis e aziendas chi traballant cun su turismu e tenint sa punna de ponni in pei unu turismu sustenìbili e birdi innoia is protagonistas ant èssiri is zonas ùmbidas de sa costera a ingìriu de Aristanis.

Nàsciu in su 2020, su “Club Friends of Maristanis” est unu logu innoia dògnia operadori traballat po donai fundamentas a is ideas chi rapresentant su coru de su progetu “Maristanis”, chi, ddu regordaus, est fillu de sa “Fondazione Medsea (Mediterranean Sea and Coast Foundation) chi tenit domu in Casteddu.

app terraBisòngiat a sutalineai ca fintzas a su mesi de ledàminis passau fiant giai unus cantu, vinti-seti in totu, is operadoris chi iant pigau parti a custa retza. De su mesi de onniasantu, perou, sa famìlia de su “Club Friends of Maristanis” s'est ammanniada meda. Difatis, in diri de oi, is operadoris chi ant detzìdiu de s'auniri a sa retza funt sa bellesa de cincuanta e unu.

Custu resurtu est lòmpiu a pustis de unu traballu de spainadura asuba de unus cantu temas ambientalis, temas chi funt su coru de totu su traballu de su progetu Maristanis. Custu est istètiu unu momentu de importu, poita su traballu de spainadura est sighiu po una pariga de mesis e at fatu acostai meda operadoris a su progetu.

Ma cali at èssiri s'impignu de custas realidadis chi ant detzìdiu de pigai parti a su “Club Friends of Maristanis” po realizai unu progetu sustenìbili e birdi? S'impignu in custu momentu est su de batallai po amenguai is consumus de àcua. S'àcua, prusetotu sa druci, est una resursa sugeta a s'ammaletzu de sa pressioni antròpica. Cun custa punna, difatis, funt nàscias duas app chi si lamant “Acqua check”, dedicada a is aziendas, e “Risparmia acqua”, dedicada a is tzitadinus.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags