Unife in Sardigna po trasformai in resursa s'àliga impestadora de su granitu
Terra – S'Unife (“Università degli Studi di Ferrara”) lompit in Sardigna po trasformai in resursa s'àliga impestadora de su granitu.
Su granitu, difatis, no est feti una pedra bella meda, ma est puru una pedra chi, candu benit traballada, impestat. De su traballu cosa sua, difatis, s'ingedrat un'iaxi de àliga chi fait dannu a s'ambienti; seus fueddendi prusatotu de su tretu chi s'agatat a ingìriu de is cabas. Po ddu cumprèndiri mellus bastat a castiai a is cabas de Uddusò, logu innoia s'est isboddiendi su progetu de circa “Life Regs II”.
“Recycling of granite Scraps II – Life Regs II” est finatziau de sa Comunidadi Europea e est unu progetu ghiau de sa Professora Carmela Vaccaro de su Dipartimentu de “Scienze dell’Ambiente e della Prevenzione” de s'Universidadi de Ferrara.
Su progetu tenit sa punna de mudai in sustenìbili sa bogadura de su granitu. Duncas, s'obietivu de “Life Regs II” est donai una vida “green” (birdi) a s'àliga produida atressu de sa traballadura industriali de sa pedra.
“Recycling of granite Scraps II – Life Regs II” s'insertat in su caminu promòviu de s'Unione Europea po su “Green Deal”, est a nai po unu frunimentu de mineralis industrialis e matèrias primàrgias crìtigas sustenìbilis e seguras. No est po nudda ca custu progetu ndi betit resurtus ambientalis importantis. Intre custus ddoi at sa rimotzioni de 47.000.000 de chilus de refudus de granitu e s'imbuschimentu de 10 ètarus de terra.
Sa mudada manna, perou, est un'àtera e pertocat su recùperu e sa cunversioni de sa produtzioni de su distretu de Uddusò e sa creatzioni de collaboratzionis intre issèntzia, impresas e autoridadis pùbblicas chi promovint unu modellu tecnològicu de economia tzirculari po finas in àterus giassus italianus e europeus.
Su progetu “Life Regs II” non tenit comenti obietivu primàrgiu scèti s'isvilupu de protzedimentus innovativus po su mundu de sa traballadura industriali de su granitu, ma tenit sa punna de fai puru un'impiantu de produtzioni de energia lìmpia capassa de ponni in motu unu ciclu tecnològicu sustenìbili.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
