Binos de Sardigna: s'acrònimu DOGC

In sa Mesa - DOGC est un'acrònimu chi bidimus meda in sas etichetas de sas ampuddas de sos binos. Ma ite cheret nàrrere custa sigla? DOGC cheret nàrrere "Denominazione di Origine Controllata e Garantita" e in sa classìfica de sos binos indentìficat unu livellu de amparu superiore.

Sos binos cun marcu DOCG sunt difatis sutapostos a règulas de produtzione prus severas de sos produtos cun sos marcos DOC e IGT e ant peri disciplinares de produtzione restritivos meda.

Sa "Denominazione di Origine Controllata e Garantita" s'identificat cun territòrios minores comente sas baddes, sos montigros e sas comunas. In Sardigna amus su "Vermentino di Gallura DOCG", unu binu fatu cun s'àghina coltivada in sa regione istòrica de sa Gaddura.

No est totu, pro ite depimus nàrrere ca sa denominatzione DOCG podet previdire duos livellos ulteriores de classificatzione chi cunsentint de individuare caraterìsticas dislindadas in intro de unu territòriu. Comente si podet cumprèndere, custos duos livellos ant vìnculos de calidade prus restritivos. Vìnculos chi depent èssere indicados in su disciplinare. Ambos sos livellos podent èssere iscritos in s'eticheta paris cun sos mentovos.

Pro otènnere su marcu DOGC bisòngiat àere printzipiadu finas una caminera de livellu inferiore. Difatis su marcu "Denominazione di Origine Controllata e Garantita" lu podent àere feti sos binos chi ant giai otentu su marcu DOC e chi, comente sutalineadu in antis, sunt produidos in zonas pretzisas. Sos binos DOC chi ant otentu custu reconnoschimentu lu depent àere a su mancu dae 10 annos.

Duncas, sos produtos chi ant sa punna de otènnere su marcu DOGC sunt binos de primore siat pro su chi atenet a sa calidade issoro, siat pro sas caraterìsticas intrìnsecas de su binu, siat pro su chi atenet a sa numenada cummertziale achirida.

In s'eticheta de sas ampuddas de sos binos DOCG agatamus semper sa didascalia "Denominazione di Origine Controllata e Garantita" e s'annada de sa binnenna. Sa didascalia DOGC est incluida in sa denominatzione europea DOP.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22