Noe produtos sardos sunt presìdios de sa "Fondazione Slow Food per la Biodiversità Onlus"

Unu progetu nàschidu in su 2000 pro sarbare sa bio-diversidade alimentare
26 Gennaio 2022
in sa mesa

In sa Mesa - In Sardigna noe produtos agroalimentares sunt presìdios de sa "Fondazione Slow Food per la Biodiversità Onlus". Su de sos presìdios "Slow Food" est unu progetu nàschidu in su 2000 pro sarbare sa bio-diversidade alimentare.

Ma comente s'isbòligat su traballu de "Slow Food"? Sèmplitze: marchende sos produtos chi arriscant s'estintzione e creende unu catàlogu virtuale batijadu "Arca del Gusto". Custu est unu catàlogu ricu meda e ogni die s'arrichit cun variedades vegetales, ratzas animales, panes, tipos de casu, salumes e durches.

Sos presìdios de "Slow Food" rapresentant sa comunidade de produtores chi s'ispirat a sa filosofia "Slow Food", una filosofia chi tutelat su produtu traditzionale, su territòriu e su patrimòniu culturale materiale e immateriale in ue sos produtos naschent. Duncas, podimus sutalineare ca sos presìdios "Slow Food" de Sardigna sunt un'espressione de sa cultura e de su eco-sistema de s'ìsula.

in sa mesaMa ite faghet "Slow Food"? "Slow Food" cumpartzit cun sos produtores de sos presìdios suos sas lìnias chi rapresentant sas ghias pro ogni filiera produtiva; bàrdiat a sos disciplinares de produtzione e a sas etichetas de sos produtos; ordìngiat atividades de formatzione pro megiorare sa sustenibilidade de sas filieras; promotzionat a sos produtos de sos Presìdios in sos adòbios natzionales, territoriales e internatzionales comente "Terra Madre, "Cheese" e "Slow Fish"; creat finas cuntatos tra sos produtores de sos Presìdios e sos coghineris de s' "Alleanza Slow Food", cun sos "Mercati della Terra" e cun sas realidades produtivas chi ant interessu a achistare o a trasformare sos produtos suos; in fines contat sas istòrias de sos produtos, de sos produtores e de su territòriu. Lu faghet pro mèdiu de videos, publicatziones, artìculos, cunferèntzias.

Tra sos Presìdios sardos agatamus: su Presìdiu "Slow Food" "Razza sardo Modicana", nàschidu pro valorizare sa petza de custa ratza de baca; su Presìdiu "Slow Food" "Fresa di Ittiri", est a nàrrere unu casu de berbeghe tìpicu de Ìtiri Cannédu; su Presìdiu "Slow Food" "Zafferano di San Gavino Monreale", ispètzia impreada meda in sa coghina de Sardigna; su Presìdiu "Slow Food" Pompìa, un'agrume tìpicu de Thiniscole; su Presìdiu "Slow Food" "Pecorino di Osilo", casu de berbeghe tìpicu de Osile; su Presìdiu "Slow Food" "Pecorino dell'Alta Baronia", unu casu berbeghinu de Sa Baronia de Thiniscole; su Presìdiu "Slow Food" "Fiore sardo dei pastori", unu casu de berberghe chi si faghet in sas comunas de Gavoi, Ollolai, Ovòdda, Lodine, Fonne e Orgòsolo; su Presìdiu "Slow Food" Casizolu, su casu de baca chi si faghet in s'àrea de su Montiferru; e su Presìdiu "Slow Food" s'Axridda "di Escalaplano", unu casu de berbeghe ùnicu, chi comente narat su nùmene suo si faghet feti in Scalepranu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags