Gùspini: su "Premio qualità mieli tipici della Sardegna" lompet a sa de bintiduas editziones

Su 27 de austu sa premiatzione
21 Luglio 2022
in sa mesa

In sa Mesa - Ocannu lompet a sa de bintiduas editziones su "Premio qualità mieli tipici della Sardegna". Comente si podet lèghere in su giassu internet de sa comuna de Gùspini, custu est unu cuncursu reservadu feti a sos meles tìpicos de Sardigna. Sa punna de su progetu, difatis, est de intzentivare sa produtzione mègius de mele sardu.

Su cuncursu est aprontadu dae sa comuna de Gùspini paris cun sa Pro Loco locale, s'Agenzia regionale LAORE, su GAL Linas Campidano. Partetzipat a s'organizatzione peri s' “Albo Nazionale degli Esperti in Analisi Sensoriale del Miele”.

Duas sas setziones prevididas dae su cuncursu: una est dedicada a sos meles fatos dae sas aziendas iscritas a sa “Camera di Commercio” de Casteddu comente impresas agrìculas. Tocat a pretzisare ca custas realidades devent finas àere abiarzos iscrìtos in sa BDA, est a nàrrere sa “Banca Dati Apistica”.

Sa de duas setziones est apòsita pro sos meles produidos dae sos abiaresos chi faghent mele pro su consumu de sa famìlia issoro. Finas custos produtores devent àere abiarzos iscritos in sa BDA e su nùmeru màssimu de abiarzos devet èssere de deghe. Ant a pòdere leare parte a sa de duas setziones finas sos entes pùblicos chi ant abiarzos iscritos in sa BDA ONLUS.

Sa data de iscadèntzia pro sa cunsinna de sos meles de atòngiu e de beranu fiat s'1 de su mese de argiolas 2022 coladu, mentres pro su mele de eucaliptus sa data est fissada pro s'1 de austu 2022. Pro custa tipologia de mele, duncas, b'at galu tempus.

Pro onni tipologia de mele sa cunsinna si faghet cun 5 botos de 250 gr cada unu: 4 botos non devent àere su nùmene e 1 feti devet àere s'eticheta sua. In prus, sos produtores chi leant parte a custu premiu devent imbiare s'ischeda de partetzipatzione chi si podet agatare in su giassu de sa comuna de Gùspini. At a tocare imbiare o cunsinnare totu a: “Associazione Pro Loco Guspini via San Nicolò, 17 09036 GUSPINI SU”.

Su 27 de austu s'at a tennere sa premiatzione finale. S'ocasione at a èssere sa Sagra de su mele de Gùspini.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags