Aberta in Nuchis sa primu biblioteca de cultura enogastronòmica sarda

Protagonistas de s'initziativa Mirtò e sa comuna de Tempiu
26 Agosto 2022
in sa mesa

In sa Mesa - Sa nova est de carchi die faghet e contat un'atividade de importu pro sos chi cherent ischire carchi cosa in prus a pitzu de sa cultura enogastronomica de Sardigna.

In Nuchis, biddighedda chi pertenet a sa comuna de Tempiu, difatis, ant abertu sa primu biblioteca chi at comente punna sa de educare sa gente a s'enogastronomia sarda. Est unu passu a dae in antis a bia a una consièntzia chi atenet a sa richesa de sa coghina de s'ìsula.

Su progetu est nàschidu dae sas ideas de “Mirtò”, su Festival internatzionale de sa murta, chi l'at realizadu paris cun sa comuna de Tempiu.

Gosi, su 5 de su mese de austu coladu, Gianni Addis, su sìndigu de sa comunidade gadduresa, at inchingiadu sa biblioteca de Nuchis paris cun s'Assessora a sa Cultura Monica Liguori, cun Anna Paola Isoni, Assessora a sos serbìtzios sotziales de Tempiu, e cun Elisabeth Vargiu, Assessora a su Turismu. Pro s'abertura de sa biblioteca fiant presentes peri: Piera Azzena, est a nàrrere sa vize-sìndiga de sa bidda de Teltis, Nicola Mancini de “Mirtò”, e Caterina Pirrolu de su Comitadu promotore de sa festa de sos santos Cosma e Damiano, sos pratronos de Nuchis.

Su pensu chi rapresentat sas fundamentas de custu progetu est su de sa consièntzia de una netzessidade: sa de valorizare sa cultura enogastronomica sarda comente parte importante e de interessu de totu sa cultura de Sardigna. Gosi, sa biblioteca de Nuchis cheret èssere su puntu dae in ue fàghere mòere su caminu de una sensibilidade noa.

Gràtzias a s'atividade de sa biblioteca, s'enogastronomia de Sardigna at a èssere contada pro mèdiu de una filera de òperas editoriales in ue passu passu s'at a atraessare totu sa traditzione coghinera de s'ìsula. Sos organizadores de s'initziativa culturale ant fatu ischire ca s'at a cumentzare pròpiu dae sa Gaddura e dae Nuchis.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags