Creschet su biològicu in Sardigna. Sas etzellèntzias suas in Norimberga

In un'annu sas superfìtzies sardas biològicas sunt crèschidas de su 2,4%
5 Agosto 2022
in sa mesa

In sa Mesa - Bonas noas dae sos sartos de s’isula. In un'annu, dae su 2020 a su 2021, cunforma a sas elaboratziones de Coldiretti Sardegna movende dae sos datos publicados dae su Sinab, sas superfìtzies sardas biològicas sunt crèschidas de su 2,4%. De prus finamentas sos operadores cun una pertzentuale de su 5,4. S'ìsula, difatis, cun 150.456 ètaros (su 12,7% de su totale), nche lompet a sa de sete positziones intre sas regiones italianas; sas impresas bio, imbetzes, sunt 2.202 cunforma a sas 86.144 de s'istadu.

E positivas sunt finamentas sas tendèntzias de sos consumadores: in s'ùrtimu deghènniu – datos Biobank – sas bèndidas totales marcant unu +122%. E de tres italianos, duos (su 64%) càrrigant sos carrellos issoro de produtos bio. «In Sardigna - narat Giorgio Demurtas Presidente Provintziale de Coldiretti Casteddu - dae belle un'annu amus fatu su Distretu prus mannu de Itàlia, pro dare una domo comuna a totus sas aziendas chi tzertificant o cherent tzertificare biològicu».

Su distretu, sas dies coladas (dae su 26 a su 29 de trìulas) fiat impinnadu cun 15 aziendas in Norimberga, in sa fiera Biofach leader mundiale pro sos alimentos biològicos. «Una vetrina internatzionale chi acasàgiat sas mègius realidades bio – at afirmadu su Presidente de su Distretu Bio Sardigna Andrea Campurra -. Comente distretu tenimus unu stand nostru pro sas aziendas assotziadas chi amus seletzionadu pro mèdiu de un'avisu. Sas primas duas dies de sa fiera ant cunfirmadu s'importu de s'apuntamentu. Est una grandu oportunidade pro sas aziendas e pro su Bio Distretu nostru sa de presentare sas etzellèntzias biològicas nostras in totu su mundu. Una tapa importante in su progetu nostru de valorizatzione de su setore biològicu sardu chi sighit a crèschere e tènnere semper prus cussèntzia de sas enormes potentzialidades suas».

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags