Lompet a sa de XXVIII editziones sa ""Sagra del Vermentino" de Monte

Totu prontu pro domìniga 7 de austu
4 Agosto 2022
in sa mesa

In sa MesaEst totu prontu pro sa "Sagra del Vermentino", sa manifestatzione enològica e enogastronòmica chi at a èssere acasagiada in Monte domìniga 7 de austu chi at a bènnere.

Ocannu sa "kermesse" lompet a sa de XXVIII editziones e sa comunidade de sa bidda chi s'agatat in su territòriu de su Monte Acuto at aprontadu onni cosa pro acollire sos bisitadores.

Sos organizadores de sa sagra, aprontada dae sa "Cantina sociale del Vermentino", comente in sas editziones coladas, isetant bisitadores meda. Custu, difatis, est unu momentu importante pro promotzionare su produtu locale de su territòriu. Faeddamus massimamente de su binu Vermentinu, una produtzione de primore pro totu sa Gaddura.

Custa manifestatzione est nàschida in su 1992 e dae tando sighit cun determinu cun sa punna de bèndere sos binos produidos dae sa "Cantina sociale del Vermentino" etotu. Tra custos podimus regordare sos binos prus famados, est a nàrrere sos chi ant otentu prèmios importantes, comente sos biancos "Funtanaliras", "Arakena", "Balari" e sos nieddos "Galana", "Kiri", e "Tàmara". Sunt produtziones ligadas a s'istòria e a sas caraterìsticas de su territòriu de Monte.

Tocat a pretzisare ca custa est una sagra de importu mannu pro totu sa Gaddura, difatis est connòschida finas dae unos cantos turistas chi onni annu torrant a la bisitare.

Su cumentzu de sa sagra est in programma pro sas 18.30 in sa pratza de s'enopòliu de sa bidda. Bisòngiat a sutalineare ca custa at a èssere un'ocasione importante peri pro promotzionare àteros produtos locales. Monte, comente s'ischit, est famada meda finas pro sa produtzione de su mele. Pro custa resone, difatis, su 6 de austu, est a nàrrere sa die in antis de sa sagra, est prevìdidu unu momentu dedicadu a su tastu de sos mègius abamele de Sardigna. Su 7 de austu est in programma unu cunvegnu dedicadu a su mele.

Sa sagra previdit tastos de mele, binos e casu locales.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags