In Setzu domìniga 21 de austu sa "Sagra de sa Fregua e de su Pani Indorau"

In sa Mesa - Est in programma in Setzu domìniga 21 de su mese de austu chi at a bènnere. Semus faeddande de sa de XIII editziones de sa "Sagra de sa Fregua e de su Pani Indorau", una manifestatzione gastronòmica chi est organizada dae sa comuna cun s'agiudu de totu sa comunidade de sa bidda.
 

Su tzentru de sa Marmidda contat una chentina de ànimas pagu prus o mancu, s'agatat a peales de sa Jara Manna e presentat una coghina locale ligada a forte cun su territòriu. Est una gastronomia in ue sunt protagonistas massimamente: sa petza, sos tzitzigorros e sos tuntunnos. Una coghina chi at ligàmenes importantes cun sa traditzione. Dae su disìgio de la valorizare naschet cust'apuntamentu gastronòmicu chi dae 13 annos si faghet semper in sa segunda metade de su mese de austu.

Sa sagra at a cumentzare a merie, a sas 15.30, cando ant a èssere abertas sos "stand" de sos espositores. Tra sos momentos prus importantes de sa manifestatzione gastronomica b'at a èssere s'aprontamentu de sa fregua e de su pane indoradu, un'atopu chi est in programma in "Casa Deligia" a sas 18.30. A pustis, est a nàrrere dae sas 19.30, sos bisitadores ant a pòdere tastare sos màndigos fatos cun fregua e pane indoradu. S'apuntamentu est in carrera "Chiesa" e at a èssere acumpangiadu dae sa mùsica de su maistru Ignazio Cadeddu.

Tocat a sutalineare ca pro custa ocasione sa comuna at detzisu de abèrrere a sos bisitadores siat sa crèsia siat su campusantu monumentale siat sa domo tìpica chi s'agatat in Pratza e idda.

Sa "Sagra de sa Fregua e de su Pani Indorau" at a èssere un'apuntamentu de interessu peri pro sos apassionados de sa mùsica traditzionale de Sardigna. Difatis, tra sos apuntamentos musicales a sas 17.30 b'at a èssere una gara de poesia sarda cun Efisio Caddeo e Giuseppe Caddeu chi ant a èssere acumpangiados dae su sonete de Gianfranco Massa.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22