Torrat sa “Sagra de su frigadori e de is cocoeddas” de Stersili e lompet a sa de 13 editziones

Sa manifestatzione enogastronòmica s'at a isboligare 12 de su mese de austu
10 Agosto 2022
in sa mesa

In sa Mesa - In Stersili torrat sa "Sagra de su frigadori e de is cocoeddas". Sa manifestatzione enogastronòmica, chi est organizada dae sa Pro Loco de sa bidda chi s'agatat in sa Barbàgia de Seùlu, ocannu lompet a sa de 13 editziones.

Comente onni annu, peri in su 2022 su programma at a èssere ricu meda. Tocat a sutalineare, però, ca sos protagonistas de sa festa de Stersili ant a èssere sos màndigos de sa traditzione, sos pratos bonos fatos dae sa comunidade stersilesa, est a nàrrere su frigadori e is cocoeddas chi dant su nùmene a sa rassigna gastronòmica etotu. Sa comunidade, in custas dies chi antìzipant sa festa, est traballande pro ammaniare sos màndigos chi, su 12 de austu chi at a bènnere, ant a èssere serbidos a sos bisitadores. Lu podimus bìdere intrande in sa pàgina Facebook de sa Pro Loco de sa bidda de Stersili. Sos organizadores, difatis, ant publicadu sas fotografias.

Tocat a pretzisare ca in programma no bi sunt feti sos tastos de sos pratos de sa coghina stersilesa. B'est meda àteru. Difatis, dae sas 8.30 de mangianu s'at a pòdere bisitare finas su situ archeològicu Monti 'e Nuxi e sos bisitadores ant a èssere acumpangiados dae s'esperta archeòloga Alessandra Saba.

A sas 11.00 ant a èssere abertos sos “stand” e ant a èssere fatos finas unos cantos laboratòrios. Tra custos su laboratòriu pro ammaniare sas cocoeddas e su laboratòriu pro ammaniare su casu.

In programma finas sa mùsica de sa “Seuinstreet Band”, su grupu chi dae sas 11.00 at a girare pro sas carreras de sa bidda sonande e batinde allegria a sos chi ant a lòmpere a sa bidda de sa Barbàgia de Seùlu. Su merie, imbetzes, at a èssere possibile ascurtare su “Coro Carrales” e sa mùsicade sos “Symponia”.

Sa festa previdit àteros apuntamentos ispantosos meda. At a sighire difatis finas a de note cun “Pino e gli Anticorpi” e cun su “dj set” de Valentino Poddie.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags