Binu: aprontada s’annualidade 2023 pro sos agiudos a su setore

In sa Mesa - In intro de su Programma natzionale de amparu de su setore vitivinìculu 2019-2023, sa Regione sarda est dende a ischire a sos interessados de àere abertu sos tèrmines pro sa presentatzione de sas dimandas de agiudu “Misura investimenti“ annualidade 2023.

Cunforma a cantu comunicadu dae s’Assessoradu de s’Agricultura, «sa medida previdet s'erogatzione de un'agiudu pro sa realizatzione de investimentos materiales e/o immateriales in impiantos de trasformatzione, in infrastruturas vinìculas e in sa cummertzializatzione de su binu». Sa punna diat pàrrere sa de favorèssere su megioru de su rendimentu globale de s'impresa, s'adeguamentu suo a sa dimanda de su mercadu, su crompimentu de una cumpetitividade prus manna, fintzas pro chi b’apat rispàrmios energèticos, efitzèntzia energètica globale e tratamentos sustenìbiles. Sa medida pertocat sa terra nostra ebbia: «Podent benefitziare de s'agiudu – leghimus - sos sugetos operadores in su territòriu regionale intreu pro investimentos localizados in su territòriu regionale ebbia». Sas impresas chi podent presentare dimanda podent èssere sìngulas o assotziadas, bastis chi tèngiant «sede legale» e/o operent inoghe.

Sas dimandas de agiudu podent èssere annuales o biennale e cherent presentadas intro e non prus a tardu de su 15 santandria 2022, francu pròroga eventuale dae parte de s'"Op Agea". Sa cumpiladura e sa presentada de sas dimandas de agiudu devet èssere fata online, impreende sas funtzionalidades postas a disponimentu de "Agea" in su portale "Siant".

Pro sa cumpiladura e sa presentada de sas dimandas est netzessàriu a s’indiritzare a sos "Caa" autorizados dae "Agea" cun mandadu cunferidu e a sos lìberos professionistas abilitados a sa redatzione de su progetu, chi ant tentu unu mandadu iscritu dae parte de sos benefitziàrios e chi siant acreditados dae sa Regione pro s'atzessu a s'àrea riservada de su portale "Siant" e pro sa cumpiladura de sas pregontas de agiudu online.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22