In Crabonaxa torrat "Villasimius un accento di... Vino"

S'editzione 2022 de sa manifestatzione enològica est prevìdidu pro chenàbura 30 de cabudanni
29 Settembre 2022
in sa mesa

In sa Mesa - In Crabonaxa torrat "Villasimius un accento di... Vino". S'editzione de ocannu est prevìdida pro chenàbura 30 de su mese de cabudanni, s'at a isboligare in carrera "Umberto I" e at a incumentzare a sas 19.00.

Sa manifestatzione enològica est organizada dae sa Comuna de Crabonaxa paris cun s'Ufìtziu turìsticu de Crabonaxa e cun su suportu tècnicu de s'"Agenzia Laore Sardegna".

"Villasimius un accento di... Vino" 2022 at a àere comente protagonistas sos binos de 19 realidades produtivas de Sardigna. Onni cantina at a incrarire a sa gente presente comente in s'ìsula nostra s'isbòligat su mundu de sa coltivatzione de sa bide e finas comente s'isbòligat su mundu de su binu.

Tocat a pretzisare ca su programma de "Villasimius un accento di... Vino" est interessante meda e est pensadu pro permìtere a sos bisitadores de tastare unos cantos binos sardos. Faeddamus de sas ampullas fatas dae sas 19 cantinas chi sunt protagonistas de s'addòbiu etotu. Onni binu presente a sa manifestatzione - tocat a lu sutalineare - est una bèvida primorosa.

Sos tastos de binu ant a èssere acumpangiados dae tastos de àteros produtos fatos in Sardigna, produtos chi ant marcu de calidade e finas de produtos tìpicos sardos. Sos tastos de sos binos sunt a incuru de sos "sommelier" de sa FIS, est a nàrrere de sa - "Federazione Italiana Sommelier - Wine and food Service".

Pro leare parte a sos tastos aprontados dae "Villasimius un accento di... Vino" at a tocare a comporare unu "ticket" de deghe èuros. Su "ticket" at a incluire una tassa cun una butzaca portatassa, bator tastos de binu e unu tastu de produtos tìpicos de Sardigna.

Pro àere àteras informatziones si podet andare a manera dereta in s'Ufìtziu turìsticu de Crabonaxa, o puru si podet iscrìere un'e-mail a s'indiritzu de posta eletrònica: villasimiusturismo@gmail.com; galu si podet finas telefonare a su nùmeru: +39 070 7930 271.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags