Naschet "Queen Elisabeth": sa pitza sarda pro sa Reina inglesa

Emiliana Scarpa binchet su “Trofeo Sorbillo”
21 Settembre 2022
in sa mesa

In sa Mesa - Sa pitza sarda chi torrat onore a sa Reina inglesa si lamat "Queen Elisabeth"e naschet dae sa mastra de sa pitza Emiliana Scarpa.

Sa mastra de sa pitza Emiliana Scarpa, nòdida comente Emy Scarpa, at difatis bìnchidu in Nàpoli su primu "Trofeo Memorial Rodolfo Sorbillo". Sa gara s'est isboligada in Posillipu in sos aposentos de "Villa Imperiale". Su "Trofeo Memorial Rodolfo Sorbillo" est organizadu dae s' "Associazione Promozione Sociale impastatori Italiani Ed" e dae su mastru de sa pitza Luciano Sorbillo, fìgiu de Rodolfo Sorbillo.

Emy Scarpa conchistat su paladu de sa giuria cun chimbe propostas, tra custa b'est su màndigu binchidore, est a nàrrere sa "Queen Elisabeth". Una pitza chi naschet dae una retzeta chi at comente protagonistas feti ingredientes tìpicos de Sardigna. Su resurtadu est una pitza originale e simbòlica, chi at sa forma de una una corona decorada dae culurgiones fatos cun una cumassa niedda, chi at comente ingrediente sa tinta niedda de sa sèpia, pìcolos de bùtariga e crema "Parmentier" fata cun matafaluga isteddada.

Gosi, gràtzias a sa "Queen Elisabeth", prima in sa categoria "con cornicione", e gràtzias finas a sos resurtos otèntos in àteras bator categorias, Emy Scarpa at conchistadu sa copa.

No est totu, pro ite cun sa pitza "S'incontru" Emy Scarpa est lòmpida peri a su de tres postos in sa categoria "Napoletana". "S'incontru" est una pitza fata cun produtos tìpicos de Sardigna e de Campània comente sa tomatighedda de Pula e sa tomàtiga San Marzano.

Tocat finas a pretzisare ca unu resurtadu bonu meda l'at otèntu finas sa pitza "Balente".

A apostivigare su resurtadu est istada una giuria fata dae espertos famados comente Antonio Starita, Carolina Sorbillo, Alvise Cagnazzo, Nino Docimo, Iris Manco e Carlo Migliaccio.

Emy Scarpa, cun su "team Cagliari", est a nàrrere paris cun Marco Mulas e Giuseppe Viola, at otentu su de duos postos finas in sos mundiales de pitza a iscuadras chi s'est isboligadu in Palermu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags