Sa resèssida manna de sa “Cantina Santadi”

Puntègios artos meda dae “Vinodabere” e dae su crìticu americanu James Suckling
2 Settembre 2022
in sa mesa

In sa Mesa - Sa "Cooperativa sociale Cantina Santadi", realidade produtiva de sa Sardigna de su cabu de giosso nàschida in su 1960, sighit sa resèssida sua e lu faghet batende a domo puntègios artos medas pro sas produtziones suas. A la promòvere sunt istados su "magazine" "Vinodabere" e su crìticu americanu de binos e de zigarros James Suckling.

Gosi, in su mese de austu de su 2022, sa cantina de Santadi faghet faeddare de sei. Lu faghet pro mèdiu de sa crìtica italiana e de sa crìtica internatzionale.

Tra sos binos mègius su " magazine" "Vinodabere" at premiadu su binu licorosu ruju e afortigadu "Festa Norìa",una bèvida chi at otentu unu puntègiu de 100/100. Su "Festa Norìa" - acarat Massimo Podda, diretore cummertziale de sa 'Cooperativa sociale Cantina Santadi' -  "est unu 'blend' de annadas esclusivas de binu Cannonau". "Festa Norìa" est un'ampulla de meditatzione, unu binu bellu pro acumpangiare durches, casu istasionadu e erborinados, ma finas tziculate extra fondente". Otennet imbetzes su puntègiu de 98/100 su binu "Latinia 2017", àteru produtu chi acumpàngiat bene sos durches, un'ampulla chi est perfeta cun sas crostadas e sas turtas de frùtora. Su "Latinia 2017" est unu binu fatu de àghina Nascu, un'àghina bianca autòctona. Pro fàghere custa bèvida sa "Cooperativa sociale Cantina Santadi " impreat àghina chi si lassat cumprire in sa bide pro tempus meda.

No est acabada inoghe, pro ite su crìticu americanu James Suckling at finas fatu una classìfica de sos 12 binos chi ant otentu su puntègiu de 90/100. Est unu reconnoschimentu importante pro sa "Cantina de Santadi" e - comente at sutalineadu Massimo Podda etotu - "custu resurtu nos ispinghet a sighire a traballare comente amus fatu finas a oe: sa punna de sas produtziones de sa Cantina Santadi est semper istada sa de otènnere semper una calidade arta".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags