Sa sagra de sa figu morisca de Ortzai in programma su 24 de cabudanni

Sa punna de sa manifestatzione est sa valorizatzione de custa frùtora
23 Settembre 2022
in sa mesa

In sa Mesa - Ortzai est pronta pro afestare comente di depet sa figu morisca. Semus faeddande de s'atopu in programma pro cras, sàbadu 24 de su mese de cabudanni.

Po primu cosa tocat a nàrrere ca custa rassigna gastronòmica dedicada a sa figu morisca at a èssere afestada in sa matessi die dedicada a sa festa europea de su patrimòniu. Sa de duas cosas de pretzisare est ca sa bidda in provìntzia de Nùgoro at sa punna de valorizare custu frutu pòberu de sa coghina nostra e l'at a fàghere massimamente aprontande sa saba de figu morisca e faghende su "co'one de sapa", est a nàrrere unu pane de sapa tìpicu de s'ofelleria de Ortzai chi est fatu cun sapa de figu morisca, sèmenes de matafaluga, su mele, su tzùcaru e su cortzu de s'arantzu.

Gosi, dae unas cantas dies sa comunidade de sos ortzaesos at s'impignu de organizare totu sa festa. Primu ant fatu sa sapa, a pustis ant aprontadu sos durches fatos cun custu ingrediente tìpicu de s'ofeleria de Sardigna. Tocat finas a sutalineare ca custos durches ant a èssere sos protagonistas prus importantes de s'atopu.
Pro organizare sa sagra un'agiudu mannu est dadu dae s'assòtziu ortzaesu "Sarzinamentu".

Sunt sos òmines de sa bidda chi traballant sa frùtora pro fàghere sa sapa. A pustis si podent fàghere sos panes de sapa. Sunt netzessàrias tres dies pro los aprontare e còghere.

S'apuntamentu cun sa sagra de sa figu morisca de Ortzai torrat a pustis de duos annos. Comente àteras manifestatziones gastronòmicas, difatis, sa sagra de sa figu morisca non est istada organizada dae su 2020 pro more de s'epidemia cajonada dae su virus covid-19.

S'impignu de sa comunidade de Orzai est importante: fàghere un'editzione bella de sa sagra, ma finas sighire s'àndala de sa valorizatzione de custa frùtora e incumentzare unu caminu de valoritzazione de sas bio-diversidades.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags