Sa Sardigna a su "Salone del gusto". Cun boghes de paghe

Sa crae de sa filosofia de s’editzione de ocannu fiat sa paràula “paghe”
30 Settembre 2022
in sa mesa

In sa Mesa - Est in pessu arribada a sos concruos suos sa chimbe-dies torinesas de su Salone del gusto. Sa manifestatzione "Terra Madre", ammaniada dae Slow Food, cabu de logu e regione piemontesos, s’est acumprida dae su 22 a su 26 de cabudanni in su parcu Dòria.

Sa crae de sa filosofia de s’editzione de ocannu fiat sa paràula “paghe”: «S’invitu de Terra madre 2022 pro sa renàschida a totu cantos semus est indiritzadu. Tenimus bisòngiu de una mirada noa, de unu dillìriu nou. De su màndigu che a ponte de paghe». E sa Sardigna, chi diat pòdere cuncordare prus chi non bene disìgios de paghe e amore pro sa terra, pro sas caraterìsticas suas e pro sa collocatzione sua, a su Salone bi fiat. Bi fiat su Fiore sardo; bi fiat sa pompia; bi fiant sas lorighitas, su filindeu e sas tallutzas; bi fiant sos contos e sas immàgines de sos itineràrios de su Sulcis; bi fiant sas boghes nostras in sas dibatas cun s’incuinamentu in agenda etc.

E pròpiu in contu de su Salone, eris est essida sa nota de s’assessora regionale de s’Agricultura Gabriella Murgia: «Sa Regione sustenet a beru sas aziendas sardas chi pigant parte a sos eventos natzionales e internatzionale sos prus de importu, che a su Salone del Gusto de Torinu. Sunt vetrinas, custas, indispensàbiles pro sa sa promotzione de sos produtos nostros in Itàlia e peri su mundu». «Fintzas ocannu - bi la sighit – amus prevìdidu e programmadu in tempus, cun unu decretu firmadu in freàrgiu, sos interventos pro sa promotzione de s’agroalimentare aprovende s’elencu de sas fieras printzipales natzionale e internatzionales. Cun custas atziones de sustegnu diretu a sas aziendas lis damus sa possibilidade de bi pigare parte contribuende cun su 100% de sos gastos ammissìbiles che a sos pro s’allestimentu de su stand, che a sos pro sa parte chi pertocat sa comunicatzione, che a sos pro s’iscritzione a s’eventu matessi».

Sa pregonta abarrat: si amus bisòngiu de paghe e, gasi etotu, de amparare e de valorizare sos produtos de custa terra, ite est chi noghet a sa paghe e a sa terra? De ite diamus pòdere fàghere a mancu? Sa terra nostra diat pòdere èssere issa unu Salone del gusto e una prataforma de paghe.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags