Pane, binu e produtos de sa traditzione agrualimentare cun “Mojos e Marigas”

In sa Mesa - In Samugheo su fine de chida chi at a bènnere s'at a pintare de pane, binu e produtos de sa traditzione agrualimentare. Sa bidda de su Mandrolisai, difatis, dae su 3 a su 4 de su mese de nadale de su 2022 s'at a bestire a festa cun sa manifestatzione "Mojos e Marigas".

Sa primu editzione de cust'addòbiu est organizada dae sa Comuna de Samugheo paris cun sa Pro Loco de sa bidda e cun s'assòtziu "Big Now". e cun su contributu de "Su Mamudinu", de s'"Auser", de "Giardino Fiorito, de "Avis Samugheo", de "US Samugheo", de "Samugheo Trakking", de s'"Associazione culturale Mamutzones de Samugheo" e de s'"Associazione Mamutzones Antigos".

Sos protagonistas de "Mojos e Marigas" ant a èssere sos produtos de sa traditzione agrualimentare de sa bidda paris cun unu calendàriu ricu de addòbios. Tra custos est in programma, sabàudu 3 de su mese de nadale a sas 9.00, sa bisita a su casteddu de sa Medusa a incuru de s'assòtziu "Samugheo Trekking".

"Mojos e Marigas" at a sighire a sas 15.30 in "Casa Serra" cun su cunvegnu a incuru de s'assòtziu "Big Now" "Laboratòriu Mandrolisai". A sas 18.00 sos bisitadores ant a pòdere assistire a sa preparatzione de sa farra pro fàghere su pane. No est totu, pro ite sempre a sas 18.00 sa pratza de sa bidda s'at a mudare in unu "Bengodi" in ue sa gente at a pòdere satisfàghere su paladu cun casu, pratos licantzos de petza e una tassa de binu. A sas 21.00 sa festa de sos màndigos at a sighire in su tzentru istòricu cun su "street food".

Domìniga 4 de nadale, imbetzes, est sa die de su pane: dae sas 10.00 sas pratzas de Samugheo ant a èssere indanimadas dae un'arte meravigiosa: s'arte bianca de su faghimentu de su pane. No est totu, pro ite s'arte bianca de su pane at a èssere acumpangiada dae tastos de produtos locales. Semper a sas 10.00 "Casa Serra" e "Casa Caddeo" ant a abèrrere sa mustra de sos panes. Nuscos e sabores ant a èssere sos protagonistas finas a sas 10.30 cun "Invinity".

Su fine de chida de "Mojos e Marigas" at a serrare cun ballos e mùsica.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22