Santadi: torrat “Pane e Olio in Frantoio 2022”

Su 4 de su mese de nadale sa festa manna de s'ògiu ermanu lompet a sa de degheoto editziones
29 Novembre 2022
in sa mesa

In sa Mesa - Su 4 de su mese de nadale de su 2022 torrat in Santadi "Pane e Olio in Frantoio 2022". Sa festa manna de s'ògiu ermanu lompet ocannu a sa de degheoto editziones.

Sa manifestatzione est istada aprontada dae sa Pro Loco de sa bidda paris cun sa Comuna. Su programma est interessante meda e ponet s'atzentu in subra de su pane e de s'ògiu, duos produtos traditzionales de primore chi dant altivesa manna a sa bidda e a totu su territòriu de su Sulcis Igresiente. Semper che semper, sa manifestatzione s'est ismanniende finas a sos àteros produtos enogastronomicos tìpicos e a sos produtos màstrinos de sa bidda e de su territòriu chi s'agatat a inghìriu.

Ma pro ite s'addòbiu puntat in subra de su pane e de s'ògiu ermanu? Sèmplitze: pro ite custos duos produtos ant raighinas antigas meda. Sa traditzione de su pane cotu in su forru a linna, pro fàghere un'esèmpiu, est una de sas traditziones prus arraighinadas in sa cultura de sos abitantes de Santadi. No est pro nudda ca sa bidda contat bator paneterias màstrinas chi faghent tipos meda de pane: civraxiu, cocoi, pane cun olia, pane cun recotu, pane cun gherda, pane cun tomata e àteras calidades meda.

Su programma de "Pane e Olio in Frantoio 2022" proponet addòbios e letziones pràticas chi ant comente tema sa molidura de su trigu cun sa mola antiga e cun s'àinu, sa preparatzione e sa coghidura de su pane in su forru a linna, sa pintadura de su cocoi e sa traballadura de sa pasta frisca: "malloreddus e ambus".

Durante sa manifestatzione s'ant a isboligare peri bisitas ghiadas a sos molinos de s'ògiu, a sos olivàrios, a sos museos, a sas àreas archeològicas e sas àreas naturalìsticas comente sa de "Is Zuddas". Galu b'ant a èssere peri tastos de produtos tìpicos e mustras mercadu chi ant a àere comente protagonistas sos produtos enogastronomicos e artesanales mègius de su territòriu. No ant a mancare sos ispetàculos de mùsica e sos ispetàculos pro sos pitzinnos.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags