In Patiolla torrat su fèstival "Dolia è"

In sa Mesa - In Patiolla su fine de chida de sàbadu 17 e domìniga 18 de su mese de nadale 2022 at a èssere ricu meda. L'at a cundire s'addòbiu "Dolia è", chi lompet ocannu a sa de bator editziones. Tocat a pretzisare ca cun custu fèstival Patiolla s'at a fàghere finas capitale de sa poesia a bolu. In pratza Europa sos protagonistas ant a èssere su cunsonu "S'affuente" de Otzana, su cunsonu "Untana Vona" de Orgòsolo, su cunsonu "Su Connottu" de Fonne e su cunsonu "Santa Ruche" de Onieri. In programma finas bisitas ghiadas a sos monumentos de sa bidda e tastos de produtos tìpicos de su territòriu.

"Dolia è" est un'addòbiu organizadu pro promotzionare sos produtos de primore de su territòriu. In Patiolla, duncas, su bisitadore at a agatare unos cantos "stand" de màndigos, ma finas "stand" de hobbistas, artesanos e artistas. Importantes sos tastos de sos primores agrualimentares de su territòriu, cun sos produtos de sas "Cantine di Dolianova", de "Argiolas Formaggi", de sa "Copar", de "Myrsine Liquori" e àteru meda.

"Dolia è" at a abèrrere s'addòbiu a sas 10.30 de sàbadu in pratza Brigata Sassari, in ue ant a èssere assentados sos "stand" de sos artesanos e de sos hobbistas. A sas 11.30 est in programma s'abertura de s'àrea tastos e sabores e peri s'abertura de su "stand" de traditziones medievales "Memoriae Dolia Episcopatum". A mesu die est prevìdidu un'addòbiu cun s'aperiente: una tassa de binu de sas "Cantine di Dolianova". Su pràngiu, a incuru de "Saboris Antigus", est imbetzes in programma pro sas 13.00 e at a èssere totu fatu cun produtos tìpicos. Su merie at a sighire cun sa mùsica de sos tenores "Untana Vona" de Orgòsolo e de sos tenores "S'Affuente" de Otzana.

Sa die in fatu, domìniga 18, sa festa at a torrare a indanimare Patiolla cun su matessi programma. At a mudare feti su pranu musicale. Su 18, difatis, at a èssere sa die de sos tenores "Su Connottu" de Fonne e de sos tenores "Santa Ruche" de Onieri. In prus, su "momentu" musicale at a èssere arrichidu dae s'addòbiu chi s'at a isboligare in sa crèsia de "San Biagio" e chi at a àere comente tìtulu "Suoni divini - Gran Concerto di Natale".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22