Reconnoschimentos pro s'ògiu de Sardigna

In sa Mesa - Reconnoschimentos importantes pro s'ògiu produidu in Sardigna. Sunt difatis 15 sos ògios sardos de primore premiados in su "Premio nazionale Montiferru".

Su cuncursu lompet ocannu a sa bellesa de bintoto editziones. Sa manifestatzione rapresentat un'addòbiu de importu mannu pro totu su mundu de s'ògiu de olia.

In su "Premio nazionale Montiferru" s'ògiu de Sardigna at otentu unu reconnoschimentu nou e de importu mannu pro sa "Shelf life" cosa sua. Faeddamus de un'atestatzione chi arribat pro more de su mantenimentu de sas caraterìsticas chìmicas e sensoriales de su produtu etotu. Pro chie non lu ischeet devimus difatis pretzisare ca sa 'Shelf life' est su perìodu de tempus in intro de su cale un'alimentu mantenet sas caraterìsticas suas in sas cunditziones de cunservatzione e de impreu indicadas dae su produtore, pro su prus gestende sos protzessos de decadessimentu de sas cumponentes suas.

Sos ògios premiados in Sèneghe pro sa rassigna "Prenzas apertas" sunt 16 e chimbe de custos sunt ògios de Sardigna. No est acabada inoghe, pro ite tra 19 mentovos de importu, 10 sunt istados atribuidos a sas produtziones de s'ìsula.

Tra sos ògios sardos premiados agatamus unu produtu de Biddacidru, est a nàrrere s'ògiu "Ispiritu Sardu" de s' "Azienda Masoni Becciu di Valentina Deidda". S'ògiu est lòmpidu a su de tres postos in sa setzione "Bio". Galu, sa setzione "DOP / IGP" at comente protagonista un'ògiu de Orosei, s'"Evo DOP Costa degli olivi" de sa "Società cooperativa olivicoltori Valle del Cedrino", chi lompet a su de duos postos. Semper in sa setzione "Bio DOP Sardegna", a su de tres postos agatamus s'ògiu produidu dae s'"Azienda agricola Fois Antonello" de S'Alighera. In fines, sa setzione "Pluricultivar" biet tra sos protagonistas suos s'ògiu S'"Ard Pluricultivar" de s' "Impresa agricola Franco Ledda" de Aristanis, unu produtu chi batit a domo su de tres postos.

No est totu. Difatis tocat a sutalineare su mentovu mannu otentu dae s'ògiu "Chinavu" de s'"Azienda agricola Cicito Puddu" de Ulìana, mentras àteros reconnoschimentos andant a s'ògiu "S'Ard Semidana" de s' "Azienda agricola Franco Ledda" de Aristanis, a s'ògiu "Il Tradizionale" produidu dae s'"Accademia olearia srl" de S'Alighera, a s'ògiu "Gran riserva Giuseppe Fois" de s'azienda "Eredi Giusppe Fois, società agricola" semper de S'Alighera, a s'ògiu "Cuncordu" de s'"azienda Masoni Becciu di Valentina Deidda" de Biddacidru, a s'ògiu "Ollu" de s'"azienda agricola Rovelli" de Aristanis, a su "Biologico fruttato" de s'"Azienda agricola Fois Antonello" de S'Alighera, a su "Masoni Becciu" de s'"Azienda Masoni Becciu di Valentina Deidda" e a s'ògiu "DOP Sardegna fruttato verde" de s'"Accademia olearia srl" de S'Alighera.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22