Unu durche licantzu: sas mendegadas

Tritzas de pasta infustas in su mele dant vida a unu produtu PAT licantzu
8 Dicembre 2022
in sa mesa

In sa Mesa - Bellas e de sabore, sas mendegadas, nòdidas finas cun su nùmene de tritzas, acciuleddi, atzuleddi, sunt unu durche licantzu chi si faghet pro su Carrasegare.

Sas mendegadas sunt unu PAT, marcu de "Prodotto Agroalimentare Tradizionale della Sardegna". Duncas, comente totus sos produtos PAT ant unu mètodu de traballadura, cunservatzione e istajonadura consolidadu in sos annos e praticadu a manera omogènea sighende regulas traditzionales. Totu custu pro unu perìodu chi non podet èssere inferiore a bintighimbe annos.

Sas mendegadas sunt tritzas de pasta frissa infustas in su mele. Ma comente si faghent custos durches licantzos? Custos durches naschent de unu cantu de pasta longu comente unu ispaghitu chi benit pinnigadu e imboligadu finas a li fàghere leare sa forma de una tritza longa oto o noe tzentìmetros. Sos ingredientes pro fàghere custos durches sunt: s'iscete; s'ògiu de porcu; sos oos; s'abba e su mele de Sardigna.

Sa cumassa si faghet traballende s'iscete cun sos oos, a pustis s'annanghet s'ògiu de porcu e si traballant sos ingrediente finas a otènnere una cumassa lisa e omogènea. Duncas, sa cumassa benit segada in cantos minudos chi a pustis devent èssere traballados cun sas manos. Tocat a li dare sa forma de un'istrìscia fine che pare a sos spaghitos. Custas istrìscias devent àere una longària de 30 tzentìmetros.

Fatas sas istrìscias, custas benint pinnigadas in duas e fatas codulare finas a otènnere una tritza chi, cun su matessi protzedimentu, si pinnigat a manera ulteriore in duas finas a creare una tritza prus grussa. Fata sa tritza grussa, s'assentat in intro de una safata carrargiada dae unu pannu a asciutare. A pustis sas tritzas devent èssere frissas in s'ògiu buddidu e fatas indeorare. In fines sas mendegadas si passant in su mele buddidu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags