Aristanis: incumentzadu su progetu de educatzione ambientale finantziadu dae sa RAS

Su progetu est ghiadu dae s'Assesoradu de s'Ambiente de sa Comuna de Aristanis e dae su Ceas
23 Gennaio 2023
aprofundimentos

Aprofundimentu de su lunis - Est incumentzadu in su mese de ghennàrgiu su progetu de educatzione ambientale chi at comente tìtulu "La ricerca della Biodiversità" (in sardu: "Sa chirca de sa Biodiversidade"), una proposta chi est ghiada dae s'Assesoradu de s'Ambiente de sa Comuna de Aristanis e dae su Ceas.

Tocat peri a pretzisare ca custu progetu, chi pertocat a unu tema importante pro sos obietivos de s'"Agenda 2030",  at bìnchidu unu bandu de sa Regione Autònoma de Sardigna e at a interessare su territòriu de sa tzitade de Aristanis e s'àrea marina de Turri Manna, in ue s'ant a fàghere unas cantas atziones chi sunt progetadas cun sa punna de tutelare sa biodiversidade presente e finas cun sa de valorizare su territòriu, massimamente su territòriu de sa fàscia marina de sas dunas.

In su programma: una passigiada ecològica, sa bìsita a su giardinu de sa bio-diversidade,  unu murtzu ambientale e àteras atziones chi sunt una prus bella e interessante de s'àtera.

Su Diretore de su Ceas Antonio Ricciu at declaradu ca s'àrea de sas dunas rapresentat unu sistema  dìligu, unu sistema, duncas, chi meresset un'atentzione manna e una tutela majore, massimamente in istade, cando sa fàscia de sas dunas sufrit pro sa presèntzia de sa gente, reale perìgulu pro sa vegetatzione e pro sos animales.

Su progetu si movet in prus de una diretzione: sa divulgatzione, s'educatzione e finas unas cantas atziones chi devent èssere fatas a cuntatu cun sa natura etotu. S'obietivu finale de su progetu est difatis su de contribuire a sa crèschida de una cussèntzia ambientale e ecològica.

"Custu progetu est insertadu in su cuadru de sas polìticas pro s'ambiente e pro sa tutela de su territòriu de sa comuna de Aristanis", at pretzisadu  s'Assessora a s'Ambiente Maria Bonaria Zedda. E tocat finas a sutalineare ca dae pagu tempus sa Tzitade de Aristanis at otentu unu finantziamentu de 700milla euros pro sa salvaguàrdia de sas dunas.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras