Oscar de su design in Germania: binchet su Carpet Design Awards 2023 su tapete sardu "Omaggio a Maria Lai

Aprofundimentu de su chenàbura - Su tapete sardu batijadu  "Omaggio a Maria Lai" bolat in Germania pro leare parte a s'Oscar de su design, e torrat in Sardigna cun su "Carpet Design Awards 2023". S'òpera de tessìngiu chi at leadu parte a sa gara in sa categoria "Best Design Studio Artist Rugs" est firmada dae s'azienda de Tortolì Joias, unu nùmene importante in su mundu sardu de s'"art design".

Una lòmpida manna, sa de su tapete "Omaggio a Maria Lai". Difatis, s'òpera binchidora est istada tra sas 24 isseberadas pro su "Carpet design awards", su cuncursu internatzionale Domotex. Unu cuncursu de tapetes chi sunt òperas artìsticas.

Ocannu Domotex est lòmpidu a sa de degheoto editziones e s'est isboligadu dae su 12 a su 15 de su mese de ghennàrgiu coladu, in sa "Fiera Domotex" de Hannover.

Protagonista pro sa Sardigna unu "team" fatu totu de fèminas, un'iscuadra chi at tra sos nùmenes suos su de Elisabetta Usala, mere de Joias (realidade chi dae 10 annos e prus nos contat s'"art design" de Sardigna) Stefania Spanu, chi at progetadu su tapete, e sas artesanas de sa cooperativa "Tessile Su Marmuri" de Ulassa chi ant tèssidu su tapete.

S'idea chi at dadu vida a su tapete "Omaggio a Maria Lai" naschet dae un'òpera tra sas prus famadas de s'artista de Ulassa. Difatis, in su 1981 s'artista s'at fatu donu de s'òpera "Legarsi alla montagna", reconnòschida in su mundu de s'arte comente sa primu òpera relatzionale de Itàlia.  

E difatis tocat a sutalineare ca "Omaggio a Maria Lai" est su contu de Ulassa, bidda chi in su 1981 est istada unu modellu de arte relatzionale, sighende gosi s'idea de Maria Lai etotu, est a nàrrere sa de ligare sa comunidade de Ulassa a su cùcuru de sos Tacos cun unu nastru de roba de "jeans".

Unu tapete, su chi dat onore a Maria Lai, chi est realizadu cun lana sarda, ma chi s'iscòstiat dae sas òperas de sa traditzione sarda pro su design cosa sua.