In su Padiglione Tavolara unu museu cun sa diretzione iscientìfica de sa “Fondazione Nivola”

Aprofundimentu de su lunis - Tra sos progetos de Ubaldo Badas rapresentat unu tra sos prus famados. Sempermai semus faeddende de su “Paglione Tavolara” de Tàtari, un'architetura progetada in sos annos Chimbanta de su Noighentos, un'istrutura pùblica chi est nàschida dae sas ideas de duas concas mannas fìgias de Sardigna, est a nàrrere sa de Ubaldo Badas e sa de su designer Eugenio Tavolara, chi at dadu su nùmene suo a s'architetura etotu.

Cando est istadu realizadu, in su 1956, su progetu aiat sa punna de dare a s'artesanadu sardu sos aposentos chi meressiat e tocat finas a sutalineare ca pro unos cantos annos su Padiglione Tavolara l'at fatu bene, acasagiande s'ex I.S.O.L.A, est a nàrrere s' “Istituto Sardo Organizzazione Lavoro Artigianale”, chi in Sardigna pro tempus meda at fatu s'istòria de s'artesanadu artìsticu isulanu.

In sas dies coladas, sa nova chi amus lèghidu in onni giornale est ca a pustis de sa serrada de su Padiglione Tavolara, una serrada durada annos medas, su 20 de su mese de idas de su 2022 s'istrutura at torradu a abèrrere sas ghennas suas. Custu, difatis, est istadu unu tra sos obietivos de su sìndigu Nanni Campus. Dae su cumentzu de su mandadu suo, duncas, su sìndigu de Tàtari at traballadu pro acumprire a s'impignu leadu cun sa comunidade tataresa e cun totu sa Sardigna.

Tocat peri a pretzisare ca s'istrutura est de propiedade de sa Regione Autònoma de Sardigna e ca in su 2020 sa RAS at dadu sa ghia de s'istrutura etotu a sa comuna de Tàtari a su mancu pro 10 annos.

In die de oe, su Padiglione Tavolara aberret sas ghennas suas a pustis de unos cantos traballos de ristruturatzione e acasàgiat unu museu, su “Museo per l'artigianato e il design Eugenio Tavolara” chi bidet sa diretzione iscientìfica de sa “Fondazione Nivola”. Otentu finas su reconnoschimentu de interessu culturale dae Su Ministeru de sa Cultura de s'Istadu italianu, su Padiglione at a acasagiare finas su “Salone delle Botteghe”, est a nàrrere un'àrea dedicada a s'espositzione e a sa bèndida de produtos de artesanadu sardu.

Dae su 20 de su mese de idas coladu a su 31 de su mese de maju 2023 su Padiglione Tavolara acasàgiat sa mustra “Faccio con la mente penso con le mani - Artigianə, Designer e Makers della Sardegna contemporanea”, dedicada a sos artesanos, a sas artesanas e sos/sas designer de Sardigna.