Universidade de Casteddu: su DICAAR inchingiat s'annu acadèmicu de s'Iscola de Ispetzializatzione in Benes Architetònicos e de su Paesàgiu

Aprofundimentu de su lunis - Sa nova est de importu mannu pro su mundu de s'Universidade. Comente si podet lèghere in su giassu internet de S'Universidade de sos Istùdios de Casteddu, difatis, su 12 de ghennàrgiu chi at a bènnere, su DICAAR (acrònimu de "Dipartimento di Ingegneria Civile, Ambientale e Architettura" - in sardu: Dipartimentu de Ingegneria Tzivile, Ambientale e de s'Architetura) at a inchingiare s'annu acadèmicu de s'Iscola de Ispetzializatzione in Benes Architetònicos e de su Paesàgiu, una presèntzia importante pro sos istudiantes sardos de Architetura. S'Iscola casteddaja s'annanghet a sas de Bari, Genova, Ferrara, Firenze, Milano, Napoli, Roma, Torino e Venezia e rapresentat un'oportunidade in prus pro sos pitzocos e sas pitzocas chi istùdiant in sa terra nostra.

S'iscola de Casteddu, difatis, at a dare sa possibilidade a unos cantos laureados de aprofundire sos temas chi pertocant a su paesàgiu, a sos benes architetònicos e massimamente a sa relatzione chi b'at tra patrimòniu fraigadu e paesàgiu in su cuntestu de su Mare Mediterràneu. S'iscola de Ispetzializatzione in Benes Architetònicos e de su Paesàgiu garantit sa presèntzia de Professores e Professoras chi ant a lòmpere dae Ateneos importantes in totu su mundu e chi sunt giai nùmenes internatzionales de importu. Gosi, in su giassu internet de s'Universidade de Casteddu si leghet ca unos cantos professores ant a lòmpere dae s'Universitat Politecnica de Catalunya, dae s'Universidad de Sevilla, dae s'Escuela Tecnica Superior de Arquitectura, dae s'École Nationale Supérieure d'Architecture de Toulouse , dae s'University of Edimburgh - Edimburgh College of Art.

Su 12 de ghennàrgiu sa Professora Caterina Giannatasio, referente de su DICAAR, at a abèrrere sos traballos de inauguratzione de s'Iscola. Pro s'ocasione ant a èssere presentes finas Francesco Mola, Retore de s'Ateneu casteddaiu, Giorgio Massacci, diretore de su DICAAR, Edith Gabrielli, est a nàrrere sa Diretora de su "Vittoriano" e de "Palazzo Venezia".