“ARTICHOKE 2023”: su cuncursu de arte dedicadu a s'iscartzofa

Aprofundimentu de su lunis - Sa Comuna de Masainas pro sa de binti editziones de sa "Sagra del Carciofo" bandit "ARTICHOKE 2023", su cuncursu de arte dedicadu a s'iscartzofa.

Ma cale est sa punna de "ARTICHOKE 2023"? Su cuncursu at sa punna de valorizare e promotzionare siat sas artes siat s'iscartzofa, produtu de importu mannu pro sa bidda de sa Meurreddia. Difatis, custa, est una tra sas resursas produtivas majores de su territòriu.

Chie podet leare parte a "ARTICHOKE 2023"? Sas òperas de sos artistas chi ant 18 annos e prus. Galu, sos artistas devent èssere residentes in Sardigna a su mancu de ses meses. Si pretzisat puru ca a sa data de su 23 de su mese de abrile 2023 sos ses meses devent èssere acumpridos. Totus sos artistas ant a leare parte a "ARTICHOKE 2023" a indonu.

Chie at a lerare parte a su cuncursu de arte "ARTICHOKE 2023" at a pòdere interpretare su tema sighende sa creatividade sua, sa sensibilidade e sa bisione sua. Pro èssere ammìtidas a su cuncursu de arte sas òperas non devent èssere premiadas in àteros cuncursos. No est totu. Onni artista at a pòdere isseberare sa tècnica artìstica chi preferit: disignu, pintura, iscultura, tasseddu, fotografia, serigrafia, arte digitale, tessìngiu, ricamo e àteru.

Sas òperas s'ant a dèvere ispirare a sas iscartzofas de Masainas, “unu produtu - si leghet in su situ 'Masainas Turismo' - capassu de nudrigare sa carena". Est pro custa resone ca sos artistas "devent creare òperas pro nudrigare s'ispìritu". Sas òperas at a èssere espostas in una mustra chi s'at a isboligare in su matessi tempus de sa "Sagra del Carciofo".

"ARTICHOKE 2023" at a premiare cun reconnoschimentos a sas primas tres òperas classificadas. In prus at a èssere assignadu unu prèmiu "social" a s'òpera chi at a collire unu nùmeru prus mannu de votos in "Facebook"; un'àteru prèmiu at a èssere dadu a su cummertziante de Masainas chi at a ammanitzare s'espositzione mègius in sa butega sua.

Pro lèghere s'avisu pùblicu e su regulamentu e pro compilare su mòdulu de partetzipatzione tocat si collegare a "Masainas turismo".