“Barbagia” de Carlo Lizzani, custu sero in Casteddu sa pellìcula de su 1969

L’ant a projetare custu sero in Casteddu, a sas sete de sero in sa sala de sas cunferèntzias de s’ExMa, sa pellìcula “Barbagia” de Carlo Lizzani. Sa visione de s’òpera, de su 1969, est programmada in intro de sas atividades de “Cinemanifesti” (est a nàrrere una mustra de manifestos e locandinas de su tzìnema sardu de sos annos 60 e 70, una rassigna de projetziones e laboratòrios pro sas iscolas) contivigiadas dae sa Cineteca Sarda-Società Umanitaria in collaboratzione cun su Consorzio Camù - Centri d'Arte e Musei. S’istòria contada movet dae su libru “La società del malessere” de Giuseppe Fiori. Protagonista est Graziano Cassitta, interpretadu dae Terence Hill, giòvanu pastore chi ochiet a su mortore de su frade e chi, fuidu dae galera tres bias (e semper cun sos carabineris in fatu), bisat de ghiare unu movimentu separatista. Finas a como ant projetadu "Banditi a Orgosolo" de Vittorio De Seta (1961), "Una questione d’onore" de Luigi Zampa (1965), "I protagonisti" de Marcello Fondato (1967), "Sequestro di persona" de Gianfranco Mingozzi (1967) e "Uomini contro" de Francesco Rosi (1970). In programma finamentas "Dove volano i corvi d’argento" de Piero Livi (1976) e "Padre Padrone" de frades Taviani (1977).

M.P.