Depressione perinatale, un’isportellu in Tàtari

Ativados percursos pro crisis de prantu, istorbos de su sonnu e de s’apetitu, sensatzione de fallimentu, farta de energias, dificultades acostende·si a sa criadura, impudos e pèrdida de interessu in sas fainas de cada die
3 Febbraio 2023
post partum

Crisis de prantu, istorbos de su sonnu e de s’apetitu, sensatzione de fallimentu e farta de energias, dificultades acostende·si a sa criadura, impudos e pèrdida de interessu in sas fainas de cada die. Semus faeddende de unos cantos sìntomos chi diant pòdere ingendrare discumbèniu a una mama a pustis de àere illieradu.

Cun sa punna de una mègius gestione de custos fenòmenos, chi podimus incuadrare in sa prus generale “depressione post partum”, sa Als de Tàtari est aberende un’isportellu cun professionistas e percursos dedicados a sas mamas e fintzas a sos babbos pro sustènnere sa salude psico-fìsica de sa fèmina e de sa còpia.

Sende chi est prus chi no iscumproadu chi custa depressione est cosa previdìbile, s’Asl pensat chi siat de importu a aprontare atziones de interventu psicològicu pro «isvilupare atividades de coping (parare fronte, ndr), aumentare s’istima pròpia, gestire sas dificultades relatzionales de còpia e cun sa criadura».

Pro àere informatziones prus a minudu e pro su primu contivìgiu est bastante a si pònnere in cuntatu cun su Consultòriu familiare de carrera de Rizzeddu (Palatzina C) telefonende a su nùmeru 079/2062637, dae su lunis a sa chenàbura dae sas 11.30 a sas 12.30, o puru presentende·si a su Consultòriu matessi.

M.P.

© RIPRODUZIONE RISERVATA
Tags