Eritzone de mare, pisca proibida pro tres annos. In Pùllia

Aprofundimentu de su mèrcuris - In contu de eritzone piscadu in Sardigna pro s’istajone 2022/23 fìamus abarrados cun sa mudada de s’artìculu 7 de su decretu de su 14 de nadale. S’originàriu, chi paritzas crìticas aiat regortu dae parte de ambientalistas e de àteras sensibilidades, chi lu cunsideraiant tropu permissivu, naraiat chi «est proibida pro su piscadore marìtimu professionale e pro su piscadore subàcueu professionale sa bogada de esemplares de eritzone de mare sas dies de domìniga, lunis e martis».

Cun su decretu annoadu su mese coladu sa proibitzione pertocat petzi «sas dies de domìniga e de lunis». De prus: si in antis sas oras de atividade fiant sete («dae sas 6.00 finas a sas 13.00»), dae sa mudada sunt 8 («dae sas 6.00 finas a sas 14.00»). Comente si leghet in sa premissa a su dispositivu, «sos assòtzios regionales de sos piscadores subàcueos professionales de Sardigna, in data 17 de ghennàrgiu, ant presentadu s’esigèntzia de incrementare su nùmeru de sas dies setimanales, permitende sa pisca de s’eritzone de mare finamentas su martis, e de permìtere su prelevamentu e s’isbarcu finas a sas 14.00». In aterue, però, ascurtende àtere, ant pigadu àteros disinnos.

In Pùllia, pro nàrrere, su Consìgiu regionale at a provadu una lege chi proibit sa pisca pro sos tres annos imbenientes. Sa proibitzione pertocat ambas piscas, sa professionale e s’isportiva. Sa proposta at otentu 41 votos favorèvoles e unu ebbia contràriu. Custa lege no impedit a sos ristoradores de si comporare s’eritzone in àteras regiones, ma dae sas abbas de cue nemos nd’at a pòdere bogare. Giai a metade de sos annos noranta unos cantos assòtzios ambientalistas pulliesos pedeint a sa Regione de introduire lìmites a sa pisca. Un’istùdiu de su 1995, cummissionadu a su laboratòriu de Biologia marina de sa Provìntzia de Bari, cunfirmeit sa netzessidade de regulamentare sas atividades. Dae tando aproveint una lege pro proibire sa pisca in sos meses de maju e de làmpadas e, movende dae trìulas, permitende a sos piscadores non professionistas su prelevamentu de 50 esemplares (1000 pro sa pisca professionale destinada a sa bèndida). Esemplares, semper e cando, de nessi 7 tzentìmetros de diàmetru. Como sa lege noa. In Pùllia.