“Progetto Ichnusa”: torrare a dare vida a duos logos destruidos dae sos fogos

Aprofundimentu de su chenàbura - Gràtzias a su "Progetto Ichnusa" sos padentes e sa tupa mediterrànea de Sardigna torrant a bìvere a pustis de su bisestru cajonadu dae sos fogos: in Iscanu e in Sìnnia, difatis, ant pastinadu 4000 àrbores. Iscanu e Sìnnia, lu ammentamus, sunt tra sos logos sìmbulu de sos fogos de su 2021. No est pro nudda ca sas duas biddas sunt istadas isseberadas dae "Ichnusa", dae "Legambiente" e dae "AzzeroCO2" pro abèrrere s'initziativa "Il Nostro Impegno".

A oe, 17 de su mese de martzu de su 2023, sunt istados pastinados 3000 àrbores in Iscanu, e a curtzu ant a èssere pastinados 1000 àrbores in Sìnnia. Sa punna? Sa de torrare a dare vida a sa natura ferta dae sos fogos, e sa de amparare sa biodiversidade de su territòriu sardu.

Sa de Iscanu e Sìnnia est feti sa primu fase de unu progetu chi in tres annos punnat a fàghere torrare a bìvere ses logos de Sardigna ochidos dae su fogu e dae s'abba. Pro lu fàghere ant a èssere pastinados 10milla àrbores.

Pro more de sos fogos e de sa manu de s'òmine, s'ischit, sos terrinos de Sardigna sunt semper prus pòberos e sos padentes sunt semper prus dèbiles. Sos datos de su "Corpo forestale" sunt ladinos: a istajone dae 30 annos a como sunt istados registrados 2500 fogos pagu prus o mancu. Fogos chi ant bisestradu 2-3milla ètaros de padente.

Nùmeros graes, chi ponent a arriscu unu patrimòniu chi at unu balore istremenadu. Duncas, su Birrifìtziu Ichnusa de Assèmini at detzìdidu de dare una manu de agiudu a sa terra sarda, pro chircare de costoire comente si devet tupa e padentes de s'ìsula, e finas pro fàghere torrare a bìvere su patrimòniu birde de Sardigna, bellu comente in su tempus coladu.

Gràtzias a "partner" comente "AzzeroCO2" e "Legambiente", in Sardigna est istadu batidu pro sa primu bia "Mosaico Verde". Duncas, s'ìsula oe est in intro de sa Campagna pro sa forestatzione de àreas urbanas e extraurbanas e de sa tutela de sos padentes.