Sos migrantes e su karaoke de sas valchìrias. Pro ite totu custas cròmpidas?

Aprofundimentu de su mèrcuris - «In contu de migrantes, sos nùmeros chi pertocant sa Sardigna sunt intre sos chi dant prus pagu anneu cunforma a sos de sas àteras regiones de Itàlia». A lu nàrrere est su prefetu de Casteddu. A bisu nostru anneu lu dat su tzilibirche e non sos cristianos, ma dae inoghe movamus pro cumprèndere pro ite sas cròmpidas de custas chidas sunt meda de prus de sas de s’annu coladu in su matessi perìodu.

Sos datos chi tenimus sunt sos chi, agiornados a su 9 de martzu, nos presentat su ministeru de s’Internu: dae su comintzu de su 2023 nche nd’at bènnidu belle 16mìgia; belle 6mìgia fiant – semper finas a su 9 martzu – ambos duos sos annos colados, 2022 e 2021. In pràtica in custas dies bi nd’at arribende in cantidades istiales, «quando il mare è una tavola blu» (e non semus cussigende una cantzone noa a premier e vicàriu pro sos karaoke issoro). Pro seguru no at fatu un’ierru “ierrile”: chidas intreas cun temperaduras tèbias e bentos favorèvoles ant agiudadu.

Un’àtera chistione est ligada a su paisu de orìgine de sos migrantes e a su paisu de partèntzia via mare. Cunforma a su paisu de orìgine 2.383 sunt ivorianos e 2.334 guineanos, una tzifra manna intre sos 16mìgia mentovados. Cunforma a sos paisos de partèntzia su bonu de sas barcas de custas chidas sunt tunisinas. E pròpiu in Tunisia b’at àpidu sos annos colados una grandu immigratzione de traballadores de sa Costa de Avòriu e de sa Guinea. Sa Tunisia est duncas una de sas resones, in pare cun su tempus bonu de custu ierru, de sa cròmpida manna de cristianos dae sas costeras meridionales de su Mediterràneu.

Ca fintzas in Tunisia “cantant” e contant fàulas in contu de sostitutzione ètnica. Sos guvernantes de Tùnisi, comintzende dae su presidente Kais Saied, faeddant de invasiones pianificadas (su chi ant naradu sos chi ischimus nois pighende·si votos a riu faladu) pro fàghere de su paisu àrabu unu logu de nieddos. E narant su chi giai bene connoschimus, chi a Tunisia nche giughent violèntzia e cantu b’at. Est duncas creschende su ratzismu e sos assàchios. E intre sos ivorianos e sos guineanos b’at chie torrat a leare su caminu conca a sa pàtria sua; e b’at chie si nche fuit traessende su mare.

Cando fuint dae Lìbia sas barcas movent dae sa Tripolitània. Pagu o nudda b’intrat duncas su grupu Wagner mentovadu dae su ministru Crosetto e chi òperat in Tzirenàica. E semper e cando semus faeddende de pagos militzianos: su bonu de sos de Prigozhin nch’est in Ucraina. Sos chi sunt in Àfrica, Tzirenàica a banda, nche sunt in Mali, in sa Repùblica Tzentrafricana, e in su Congo.