Su decretu nou in contu de migrantes

Eris a merie si sunt addobiados in Cutro, ministros e premier, a pustis de carchi die dae s’isperdìtziu iònicu cun sas abbas chi nch’ant ingurtidu bidas intreas (unas 70) chirchende terra e isperos noos. E decretadu ant, introduende su reatu de “morte o fertas graves in cunsighèntzia de nàvigu de clandestinos”.

Dae 10 a 30 annos de presone pro iscafistas o traficantes chi siant. Ca pro sos guvernantes peruna diferèntzia b'at intre custos ùrtimos e sos primos chi a bias nudda b’intrant cun su tràficu (s’annu coladu nd’ant arrestadu 350 e su bonu de issos fiant migrantes etotu, petzi cun sas manos in su timone). Sa diferèntzia intre duas categorias de umanidade sos guvernantes la lassant però cando faeddant de “clandestinos”. Custu est tèrmine chi cherent lassare ca cherent disinnare issos chie devet intrare e cantos. Cunforma a sas esigèntzias de s’economia. O mègius, de chie la controllat pro s’interessu suo.

Resumende: si unu migrante est a manos in timone est iscafista, si unu migrante non tenet manos in timone est clandestinu; si benint a inoghe sena permissu nant chi b'at chie faghet business, ma si serbint a sos industriales no lu est prus.

https://www.publicdomainpictures.net/it/view-image.php?image=261611&picture=crociera-sul-mar-mediterraneo