Sa Die, sos augùrios de sa Corona de Logu a sos amministradores sardos

Sa Corona de Logu, assòtziu de amministradores indipendentistas, at iscritu una lìtera a sìndigos e consigeris sardos:

Amministrador@ istimad@,

Sa Corona de Logu ti faghet sos mègius augùrios suos. Ti los faghet in sardu, faeddu nostru, ca "sa natzione chi perdet su donu de sa limba", ammentaiat Remundu Piras (1905-1978), poeta mannu biddanoesu, "iscumparit lentamente".

Oe est sa Die de sa Sardigna.

Oe est sa Festa tua.

Su 28 de abrile de 229 annos como sa rebellia de Casteddu at dadu printzìpiu a su Triènniu rivolutzionàriu sardu, momentu istòricu de importu ue nd'est essida a campu, a manera prena, sa figura de Giuanne Maria Angioy (1751-1808), Babbu de sa Natzione sarda.

Su 28 de abrile de su 1794 sos sardos si nde sunt pesados in pare contra a su guvernu malu de sos Piemontesos e ant atzetadu s'onore e su pesu, s'arriscu e sa bellesa de amministrare sa terra issoro a sa sola, comente unu pòpulu dignu e fieru, in unu bisu de libertade e de ispera.

De custos fatos de importu t'invitamus a nde faeddare in sa prima setziada ùtile de Consìgiu comunale ca sa Die nostra est totu ancora de fraigare e est pretzisu ammaniare sos coros e sos sentidos de sa gente de Sardigna.

Sa libertade tenet unu prètziu e custu currispondet semper a s'impignu fitianu, a su traballu ùmile ma firmu, a partire dae sas comunidades nostras.

Ànimu, tando: sa Die nostra at a bènnere.

T'abratzamus cun afetu.

Bivat sa Natzione sarda!

Bivat sa Corona de Logu!