Casteddu: torrat “La Traviata”

Aprofundimentu de su lunis - “La Traviata” de Giuseppe Verdi, òpera lìrica de su 1853, torrat a su Teatru Lìricu de Casteddu a pustis de sete annos. S'ùrtima editzione casteddaja in presèntzia, difatis, est istada isboligada in s'istade de su 2016. S'ispetàculu chi ant fatu in su 2020, lu amentamos, s'est isboligadu in “streaming” pro more de sa pidemia de COVID-19.

At a contare s'òpera su musicologu Giovanni Bietti. Chenàbura 19 de su mese de maju de su 2023 a sas 19.00, duncas, s'espertu at a addobiare a su pùblicu in su “foyer di platea”. Bietti, chi est siat cumposidore siat pianista, est finas tra sos divulgadores musicales italianos prus istimados. Semus faeddende de un'artista chi faghet sas cunferèntzias suas, mescamente sos contzertos-conferèntzias, a manera dereta dae su pianoforte. No est acaba inoghe. Bietti, difatis, tocat a l'ammentare, ghiat finas s'initziativa de divulgatzione musicale de “Rai-Radiotre” chi at comente tìtulu "Lezioni di Musica", e est peri su curadore de sas "Lezioni di Musica" chi s'isboligant in s'“Auditorium-Parco della Musica” de Roma.

“La Traviata” de Giuseppe Verdi est unu melodramma in tres atos e at a èssere in iscena dae chenàbura 26 de su mese de maju. Su primu ispetàculu at a èssere rapresentadu a sas 20.30. A pustis de su 26 de maju, s'òpera at a torrare in iscena sàbadu 27 de su mese de maju a sas 19.00; posca, domìniga 28 de su mese de maju a sas 17.00, martis 30 de su mese de maju a sas 20.30, mèrcuris 31 de su mese de maju a sas 19.00, gioja 1 de su mese de làmpadas a sas 20.30, sàbadu 3 de su mese de làmpadas a sas 17.00 e domìniga 4 de su mese de làmpadas, semper a sas 17.00.

Pro su Teatru Lìricu de Casteddu su melodramma de Giuseppe Verdi est su de bator tìtulos de custa istajone lìrica e de ballitu. In su pòdiu b'at a èssere su diretore de orchestra e pianista Beatrice Venezi.