Sos giornales de oe #038

«Giogos de de gherra cun fogu chi giogu no est in sos montigros de su polìgonu de Teulada, a pagu tretu dae sas prajas de su golfu. S’esercitatzione Nato Joint Stars, chi nos contat de 5300 persones e 900 mezos, l’ant acumprida in s’ìsula in un’iscenàriu virtuale che però ammentat sos teatros de gherra reales e in particulare su de s’Ucraina. “Su polìgonu lu bonificamus a operatzione concruida”, narant sos militares de su Cumandu operativu interfortzas ghiadu dae su generale Figliuolo, chi annanghet: “Pro sas esertzitatziones cun fogu torradas ocannu est a li torrare gràtzias a sa Regione Sardigna”».

Bonas dies. Amus fatu faeddare in sardu fintzas a Figliuolo, ma custa nos est parta sa noa chi nos serbit pro istèrrere un’allega mirende a sos giornales sardos de oe. E movende dae sas gràtzias chi issu li torrat a s’amministratzione polìtica de custa terra, gira gira bi essit un’abbisada, unu sugerimentu a s’assessore Biancareddu chi, in defensa de su nùmeru atuale de sas autonomias iscolàsticas contra a sos disinnos de su ministru Valditara (fintzas custa est noa chi agatamus in sos giornales impaginados eris), at faeddadu de collegamentos malos, de morfologia, de presèntzia de minorias linguìsticas. A ite non b’annanghet unu: «semus sa prus terra bombardada de s’istadu e si lu faghides est fintzas gràtzias a nois» ?

Cando leghende sos giornales torramus a bìdere sa paràula “fogu” in prima pàgina custa pertocat sos vìgiles, sos pompieris chi sunt «in prima lìnia». Est su contu de 18 pompieris sardos lòmpidos a Emìlia pro agiudare. E nemos si ponet a nàrrere chi sos de sa Nato Joint Stars sa matessi cosa deviant fàghere. Nemos o pagos (e guai a lu nàrrere). S’opositzione – leghimus oe dae pinna de iscritore – est petzi sa chi nos presentant intre sos giòvanos volenterosos boghende ludu e sos fedales issoro «vàndalos mengos chi imbrutant sas òperas artìsticas pensende de sarvare su praneta». Allega, custa, trasversale e chi movet dae un'Enrico Mentana pro nche lòmpere a unu Marco Rizzo. Pensiero unico, pro nàrrere. Cun pagos contende·nos chi carchi grupu de Ultima generazione nch’est in cue e cun nemos chi contraponet sos vìgiles de su fogu a sos sordados chi “devastant su territòriu pensende de otènnere gasi sa paghe”.