Sos giornales de oe #042

Eris, presentende sa mirada a sos giornales post eletorales, amus iscritu chi custas votatziones si presentant comente unu passàgiu a su ballotàgiu intre Fratelli d’Itàlia e tzentristas pro su chi pertocat sa ghia de sa coalitzione de tzentru dereta. Oe sos giornales bi torrant finamentas ca non mancat tempus meda a un’àteru apuntamentu. E difatis in L’Unione sarda leghimus chi «non si podet mirare a sas regionales sena leare in cunsideru su votu de domìniga e de lunis» ca «cada dinàmica est ùtile pro individuare su candidadu a sa càrriga de guvernadore». E comente imbetzes leghimus in La Nuova Sardegna «prus dudas pro totus». A Solinas l’ant a torrare a candidare? Su partidu suo, pro nàrrere, non fiat presente ne in sas votatziones de Iglèsias, ne in sas de Assèmini, sos ùnicos duos logos cun prus de 15mìgia abitantes. Ma – pregontamus nois sende chi non leghimus custa dimanda in sos giornales - si b’aeret pigadu parte leende surra manna, non fiat istadu peus? E duncas, est custa ausèntzia in sas ischedas chi lassat galu aberta sa prospetiva Solinas mancari Fdi (si Roma cheret e si Giorgia lu permitit) e tzentristas si la siant gioghende pari-pari? De su tzentru-manca b’at pagu de nàrrere e de lèghere. Sos contos giornalìsticos e sas decraratziones virguletadas de sos protagonistas de cussa coalitzione nudda de nou oferint a letores e eletores. Si aberimus unu giornale italianu, La Repubblica, agatamus a Franscschini chi narat: «Elly non tenet curpas, at a cambiare totu a sas europeas». Chi sunt a pustis de sas regionales. Parimus isetende chi torret su tempus bonu cando chi sos rios aundant; ma su de Solinas est mudu. A bìdere istemus si est tragiadore.