Sos giornales de oe #44

O in unu cugioneddu o assente de su totu in prima pàgina, sa noa chi pertocat s’annestru bèllicu in Sardigna nche l’agatamus in intro de sos giornales sardos, L’Unione sarda e La Nuova Sardegna. Mancari oe siat 2 de làmpadas, die de mustra muscolare de sas fortzas armadas in Roma e die de atopu contra a sas tzerachias militares in Casteddu. Sa noa cale est? Sa noa est chi su 31 de maju sos cumponentes tziviles regionales de su Comitadu paritèticu s’est espressadu cun votu unànime contra a sos programmas de esertzitatziones militares pro su semestre. «Duas bias a s’annu – leghimus in s’Unione – lu cunvocant pro illustrare su comente ant a impreare sos tretos de Cabu Frasca, Teulada, Chirra-Foghesu e S’ena rùgia in Macumere su semestre a pustis». Su stop. comente nos contant sos giornales, est motivadu dae sa mancada atuatzione de sos protocollos sutascritos cun su guvernu natzionale. Semper s’Unione nos contat cantu custu votu potzat èssere limitadu. «Sos cumponentes tziviles de su Comipa ischint chi s’issoro no est una detzisione definitiva. Su mecanismu de su còdighe militare previdet chi, in casu de botzadura, su calendàriu de sas esertzitatziones potzat èssere aprovadu cun decretu de su ministru de sa Difesa, chi como est Guido Crosetto. In teoria su presidente de sa Regione si diat pòdere opònnere. De custa manera si diat lòmpere a una cunvoca in Consìgiu de sos ministros: unu disafiu polìticu». E Solinas, cun su partidu suo chi no at pigadu parte a sas votatziones de Assèmini e Igrèsias, custa cosa no la diat fàghere cun tratativas galu abertas pro sas regionales imbenientes. Forsis lu diat pòdere fàghere si e cando sas tensiones in intro de sa coalitzione de majoria l’ant a permìtere e cussigiare, ma non como. E de su restu, mai b’at àpidu atopu cun Solinas, mancari sas rechestas de sos tziviles de su Comipa, leghimus. E in intro de sos artìculos leghimus su proite de custu votu contràriu: chistiones ambientales, de traballu pro sos piscadores, bonìficas, mancadu rispetu de sas zonas Sic e àteru. De sa manifestatzione de oe nd’ant a faeddare cras. Forsis.