Sardigna Natzione torra bisende·si a Renato Soru

Sa punna de Bustianu Cumpostu de fraigare una domo comuna de sos sardos est semper bia. In una lìtera chi su Consitzu (itzu, a sa ‘itzichesa) natzionale de Sardigna Natzione at postu a cùrrere peri sos gùturos de internet est unu capìtulu nou de su prequel eletorale 2024. Ma no est cosa noa. Sos de Cumpostu ammentant sas «emotziones» chi proeint cando Renato Soru «si presenteit sa prima bia in s’iscena polìtica». «No l’isco – narat su Cossitzu – si vostè si l’ammentat su primu addòbiu nostru cando chistionèimus de gamas polìticas. Iscat vostè chi sa gama nostra, gasi eris gasi oe, isetende l’est una risposta. Presentet a su pòpulu sardu unu progetu polìticu lìberu dae sas fortzas polìticas esògenas, a tretu de immaginare unu benidore diferente dae sa cunditzione eterna de subalternidade, de povertade e de isvilupu trigadu e nois b’amus a èssere. B’amus a èssere cun vostè a fraigare sa Domo Comuna de sos Sardos». Chi sa cosa abarret unu prequel ebbia, pro seguru est cosa chi fintzas SNI; chi Soru tèngiat àteras ideas craru est. E si no est unu prequel est un’agigu de late ghetadu a labiolu, cun soru meda petzi in cue. E casu pagu.