Sighit sa caminera de su progetu "MENSarda-mense a km zero"

Aprofundimentu de su chenàbura - Su progetu "MENSarda-mense a km zero" sighit sa caminera cosa sua. Lu leghimus in su giassu internet de sa "SardegnaAgricoltura", tra sos giassos de sa Regione Autònoma de Sardigna. Difatis, in sas pàginas de "SardegnaAgricoltura", a incuru de s'Assessoradu de s'Agricultura e Reforma agropastorale de sa R.A.S., agatamus sa nova chi pertocat a sa progetatzione de sos servìtzios de mensas sustenìbiles, est a nàrrere su coro de "MENSarda-mense a km zero" etotu.

Ma ite est su progetu "MENSarda-mense a km zero"? Lu ammentamus pro sos chi l'ant ismentigadu. Est unu progetu nàschidu in Sardigna cun sa punna de promotzionare unu sistema in ue sos sugetos pùblicos e privados podent cumpartzire una caminera matessi. Finantziadu dae s'Assessoradu regionale de s'Agricultura e Reforma agropastorale e ghiadu dae s' "Agenzia Laore Sardegna" paris cun s' "ANCI (est a nàrrere s' "Associazione Nazionale dei Comuni Italiani") Sardegna", fintzas a oe "MENSarda" at pertocadu a sa possibilidade de unu cumpartzimentu de regulamentos e protzessos amministrativos e massimamente a s'andala de valorizatzione de sas produtziones locales de calidade e peri de educatzione alimentare.

In custu cuadru unu momentu de importu est istadu s'annestru supra sos temas de sas mensa a "km 0". Gosi, in die de oe est istada aberta sa partetzipatzione a sas mesas tècnicas chi naschent pro definire unu capitoladu chi at a èssere ùtile cando pro assignare sas mensas a km0 a sas iscolas.

S'addòbiu - leghimus in su giassu internet de "SardegnaAgricoltura" - est dedicadu a sa retza de sas comunas "Amici di MENSArda", e peri a sas aziendas de produtzione e trasformatzione, a sos gestores de sas mensas, a sas Asl, a sos coghineris, a sas iscolas, a sos assòtzios e finas a sos chi tutelant sos produtos a marcu tìpicu.

A pustis de àere tocadu unas cantas biddas de Sardigna, su 10 de argiolas chi at a bènnere est in programma s'ùrtimu apuntamentu. S'addòbiu est pro sas 9.45 in Nùgoro.