Sos giornales de oe #062

Duas noas de oe – chi "de oe de oe" non sunt – diant pòdere èssere regortas in sas categorias de mobilidade e sanidade. Ma pro comente si sunt acumpangende dae carchi chida e pro cantu galu ant a istare in agenda, duda peruna b’at pro nche las pònnere ambas suta s’eticheta de sa crònaca pre-eletorale pro sa regionales. Ca posca bi nd’at una de tres.

Sa prima pertocat sa fusione de sas sotziedades de gestione de sos aeroportos de su Nord Sardigna. Petzi ca so “who” de sas chimbe “w” mudat cunforma a su giornale.

L’Unione sarda, pro nàrrere, nos contat chi «Sa Giunta (regionale, ndr) s’at a opònnere». S’artìculu cuntenet petzi sas positziones de s’assessore sardista Antonio Moro, chi narat: «Sa Regione est obligada a amparare in cada sede sos interessos suos e pro custu at a impugnare su progetu. Sa Regione mai at sessadu de chircare solutziones chi garantant sos poderios de controllu, vigilàntzia e indiritzu a sa parte pùblica punnende a modalidades sotzietàrias chi tutelent fintzas s’esigèntzia privada». Gosi, a su chi narat Moro, mancu sa rechesta de cunvocare s’assemblea li diat tocare a sa Regione.

Su “chie” de La Nuova Sardegna, chi nde faghet noa de abertura (Moro faeddat petzi a pàgina tres), est rapresentadu imbetzes dae sos sìndigos Mario Conoci (S’Alighera), Settimo Nizzi (Terranoa) e Nanni Campus (Tàtari). Totu cantos de tzentru-dereta. «Aeroportos, sos sìndigos de su Nord. “Nono a su recursu”».

Su primu ammentemus·nos·lu in polèmica cun Moro (e sunt de su matessi partidu) carchi chida a como, favorèvole a sa gestione privada cando su pùblicu non funtzionat (e cuddu rispondende·li chi tando in S’Alighera aiant dèvidu privatizare sas bassas). E fintzas oe si nch’essit cun «sos interessos de sa tzitade in antis de sos de partidu». E chi non b’at «òrdines de iscuderia».

Su segundu non cheret «gherras de campanile» e narat chi sa regione non li devet parare su pee a s’azienda a F2i: «s’azienda cheret agiudada».

Lu sassarésu cheret fàghere sistema e agiunghet chi, gasi comente su de Portu Turre est su portu metropolitanu de Tàtari, fintzas s’aeroportu de S’Alighera lu est. E chi «su benidore de sos aeroportos» non podet mòvere dae sa «gestione pùblica».

In su mentres chi bi la sighimus cun allegas de privatizatziones, a pàgina 5 s’Unione nos contat de una gara internatzionale pro sa gestione de Abbanoa chi como est pùblica. Su chi iscriet s’artìculu, Mauro Pili, est dae tempus contra a sa sotziedade atuale. In su petzu si lìmitat a nàrrere chi «sa gestione de Abbanoa no apat unu tifu de istàdiu», ma agiunghet chi sos sardos s’espresseint pro sa gestione pùblica su 2011 pro mèdiu de referendum.

Tzertu non narat chi a Parlamentu b’at lòmpidu finamentas una lege de initziativa populare pro normare una gestione pùblica comente bene comunu. Lu naramus nois. E a bìdere istemus ite at a nàrrere su campu largu progressista in contu de abba gasi comente de aeroportos. E de sanidade.

Ca s’àtera noa cun tensione manna in intro de sa coalitzione guvernativa est sa chi riguardat sa delìbera de sos ospidales noos. Sas positziones las connoschimus. Sa chi essit a foras oe est sa de Forza Italia chi, cun boghe de s’ex assessora de su Traballu Alessandra Zedda, narat de mudare sa delìbera, de la fàghere «prus crara in contu de tempos, protzeduras e finantziamentos», annanghende chi «totu sos ospidales sardos cherent contivigiados», fintzas sa piastra de su Brotzu.

Sa de tres chi amus mentovadu a comintzu est sa de Antonello Peru, eletu cun Forza Italia, chi torrat a Cussìgiu a pustis de s’assolutzione sua. Sa noa no est giuditziària ma polìtica, cun su sossincu contra a s’aligheresu Mauro Tedde chi l’at leadu su logu: «M’at imbiadu messàgios de solidariedade posca furriende·los in unu recursu contra a mie. Chie si cumportat de custa manera non meresset de rapresentare sos sardos», leghimus in s’Unione.

Su chi b’est in sa Nuova est prus grae, cun Peru chi mentovat a Dante e su de 8 chircos de s’inferru, ma finamentas su «còdighe sardu» e sos «indignos». Peru si presentat in àula che chi aeret fatu intzidente e cun su collega catzighende·lu «cun sa retromàrtzia». Tedde, pro parte sua, in prus de nàrrere chi amigos-amigos no lu fiant, narat de àere impugnadu su recursu de Peru pro chi su partidu mantenneret s’iscrannu.

Sarvamentu! a cras!