Unica: aprontadu unu cuncursu de ideas pro sighire sa luta a sa violèntzia contra a sas fèminas

Aprofundimentu de su lunis - Sa Facultade de Ingegneria e de Architetura de s'Universidade de sos Istùdios de Casteddu at aprontadu unu cuncursu de ideas pro sighire sa luta a sa violèntzia contra a sas fèminas. Sa nova est istada publicada in su giassu internet de s'ateneu casteddaju su 26 e su mese de trìulas coladu.

Ma cale est sa punna de custu cuncursu? S'obietivu, si podet lèghere in su bandu, est su de produire unu totem chi at a dèpere mustrare sa frase, iscrita in limba limba italiana e in limba inglesa, "Non dipingermi di nero quando ero d'oro - Don't paint me black when I used to be golden". Sa frase est su resurtu de sa prima fasa de su cuncursu chi aiat su tìtulu "Un pensiero per cancellare la violenza di genere".

Tocat difatis a sutalineare ca custu cuncursu s'insertat in sa filera de initziativas chi s'Universidade de Casteddu at organizadu e at a organizare in su benidore pro dare a sa chistione de sa violèntzia contra a sas fèminas s'atentzione chi meresset, e finas ca su totem at a àere una positzione ispetziale, serente a s'istradile ruju chi s'agatat in su giardinu de su Campus casteddaju de carrera Marengo.

E ite nàrrere de sos prèmios? Su progetu binchidore at a èssere premiadu cun 1.350,00 èuros.

Est importante dare finas carchi datu in prus pro sos chi cherent leare parte a su cuncursu de ideas. Sa produtzione de su totem, difatis, depet previdire un'ispesa màssima de 4.000,00 èuros, dinare chi depet incluire finas sos traballos pro pònnere e arrangiare s'òpera in su Campus casteddaju.

Su progetu de su totem depet èssere pensadu pro durare in su tempus, duncas sos materiales ant a dèpere èssere adeguados. Non est totu. Pro ite su totem at a dèpere mustrare finas su nùmene de s'autore e su tìtulu de sa cantzone de sa frase italiana e inglesa chi amus giai mentovadu, est a nàrrere su grupu musicale "The Story So Far" e sa cantzone issoro " Clairvoyant". In prus de totu, in su totem b'at a èssere finas unu sìmbulu de sa batalla a sa violèntzia contra a sas fèminas.