Chentu e binti annos de Torres. In cherta de sa sèrie B

Aprofundimentu de su mèrcuris - Sa Torres, chi in pare cun s’Olbia est pro comintzare su campionadu de fùbalu de sèrie C (tataresos su 2 de cabudanni in Recanati), est s’àtera formatzione ruju-biata de Sardigna. Sa sotziedade Sef Torres (cun Sef chi cheret nàrrere “Società educazione fisica”) naschet in Tàtari su mese de abrile de su 1903, 120 annos a como, presentende·si in cabudanni in su teatru Politeama ammustrende sos talentos suos. Sotziedade de educatzione fìsica, e non de fùbalu ebbia, duncas. Una polisportiva diamus nàrrere oe, cun ginnàstica educativa, ginnàstica artìstica, atlètica lèbia e pesante, ischerma, podismu, nàdidu e canotàgiu (custas duas in Portu Turre) e, in fines, fùbalu. Fùbalu chi, a comintzu, no est sa prus disciplina praticada.

Petzi s’annu a pustis de unu disafiu contra a sos corsicanos de s’Aghjacciu, est a nàrrere su 1909, s’iscuadra comintzant a l’istruturare pro sos apuntamentos imbenientes. Su 1911, pro nàrrere, sa Sef Torres organizat sos campionados sardos binchende su cuadrangulare contra a sa Iosto, su Club isportivu (ambas de Tàtari) e s’Amsìcora de Casteddu.

Su ‘22 sa sotziedade comporat unu terrinu in sa parte arta de sa tzitade pro bi fraigare s’Ebadottu atuale (Vanni Sanna dae su 2001) e su ‘30 sa Torres pigat parte a su campionadu natzionale de segunda divisione artziende·nche deretu a sa prima (currispondente a sa Sèrie C de como). Gosi chi s’istajone 1931-32 non nch’àrtziat a sa sèrie B allenada dae s’ungheresu Ferenc Plemich.

Sos annos baranta su fùbalu est oramai sa prus disciplina praticada belle in totue e, a pustis de annos intreos in su campionadu interregionale, sa Torres torrat a sa C pro s’istajone 1959-60. Istòricu su derby bìnchidu contra a su Cagliari su 4 de martzu de su 1962. Sunt sos annos de sas legendas Marzio Lepri, Sergio Sabattini, Alì Fogli, Paolo Morosi e Costanzo Dettori.

Intre interregionale e sèrie C colant sos annos settanta; sos otanta sunt sos de sa conchista de sa C1 cun Gianfranco Zola. Pro duas bias sos ruju-biaitos si faddint de pagu sa sèrie B. Sa Torres est un’iscuadra cun unu coro antigu, bene arraighinadu in sos gùturos de Tàtari. Sos tifosos suos (semper in cuntierra cun sos casteddajos a bias cun registros prus chi non coloridos...e a s’imbesse) sunt sa benzina de una traditzione chi sighit a bìvere punnende a resurtados finas a como mai otènnidos. Ma no impossìbiles.