"Pedras et Sonus Jazz Festival 2023" editzione istadiale

Aprofundimentu de su lunis - Torrat a Moguru s'editzione istadiale de "Pedras et Sonus Jazz Festival 2023", chi ocannu lompet a sa de ses editziones e s'at a isboligare a probe a su "Nuraghe Cuccurada". Nuraghe chi s'agatat in su parcu archeològicu omònimu.

Sa manifestatzione musicale, chi at sa diretzione artìstica de Zoe Pia, at a andare in iscena dae su 17 a su 22 de su mese de austu.

Su fèstival, organitzadu dae s'assòtziu omònimu cun s'agiudu de su "Ministero dei Beni e Attività Culturali", de sa "Fondazione di Sardegna", de sa Comuna de Mòguru, de sa "Corsica e Sardinia Ferries", at comente "partners" nùmenes de profetu: sa "Fondazione Svizzera Pro Helvetia", s'"Associazione Time in Jazz", su "Museo delle Maschere Mediterranee" de Mamujada , sa "Grafik-Art", s'azienda "Vini Ariu", su "Dromos Festival", s'"Ente Musicale" de Nùgoro, s' "Università degli Studi di Cagliari - Produzione Multimediale", s'assòtziu "I-Jazz", sa "UniCa Radio", su "Nuraghe Cuccurada", su "FASI", s'assòtziu "Mariposas de Sardinia", s'assòtziu "Menabò", sa "Caligola Records" e sa "Fiera dell'Artigianato Artistico della Sardegna".

Tra sos protagonistas de "Pedras et Sonus Jazz Festival 2023" su "Me'Ta Quartet Reloaded", cun Antonello Salis, Fabrizio Sferra, Sandro Satta e Riccardo Lay, Zoe Pia, su trinca de sa cantante e pianista Yumi Ito, sa cantante Camilla Battaglia, su musitzista Paolo Damiani, su progetu "Le Scat Noir" e sa cantante Claudia Aru.

No est totu, pro ite at a torrare finas s'apuntamentu cun "Jatzilleri", su festival in su festival. Tra sos protagonistas: Antonio Floris, su "PNL Swing Trio", Irene Serra, Miriana Millapan e sos "Mebitek".

"Pedras et Sonus Jazz Festival 2023" no est mùsica feti. Difatis, sàbadu 19 e domìniga 20 de su mese austu, s'addòbiu s'at a fàghere nuscosu e licantzu cun su tastu de sos binos de sa "Cantina Ariu".

Sos billetes pro leare parte a sa manifestatzione musicale s'agatant  in su situ https://oooh.events.