Primàrias ei, primàrias no, primarie un caz?

Sos faeddos de Renato Soru, essidos a campu eris pro mèdiu de un’intervista publicada in sas pàginas de La Nuova Sardegna, ant postu apretu a sa coalitzione de tzentru manca in cherta de una ghia pro cumpètere in sas eletziones regionales imbenientes.

Soru, chi at faeddadu de programma in contu de iscola, energia e de àteras chistiones chi ant a animare s’agenda eletorale de sos chi nos ant a pedire su votu, at postu in sa mesa de sos alleados sa disponibilidade sua e sa chistione de su mètodu pro su sèberu, punnende a sas primàrias. Deretu sas reatziones chi podent agatare sìntesi in su «le primarie vanno bene ma...».

In su matessi giornale, oe, leghimus chi a bisu de Silvio Lai est sa coalitzione chi devet seberare sa persone, a bisu de su segretàriu Pd Comandini sa coalitzione sèberat su mètodu de sèberu e a bisu de Francesco Agus (Progressisti) sa coalitzione devet èssere unida dae unu chi a la unire bi resessat.

In foras de virguletas Agus narat fintzas chi sas primàrias, faghende·las, bi cherent fintzas pro comunales e europeas. Ma pro sas europeas ite bisòngiu b'at a dae chi cada lista curret a sa sola cun su proportzionale e sos alleados de tzentru manca punnant a eurogrupos diferentes? Paret una cantzone de Ricky Gianco.

In su mentres como connoschimus sa risposta ufitziale de Soru a Bustianu Cumpostu.

M.P.