In Sardigna b’at mortu 68 cristianos peri sas istradas. Ant a bastare sas normas noas?

Aprofundimentu de su mèrcuris - Dae cando s’annu est comintzadu in Sardigna contamus 68 mortos peri sas istradas. Sos datos Istat nos presentant una media prus arta de s’italiana: si custa est de 5,4 vìtimas cada 100mìgia abitantes, sa sarda est de 6,3. Sas cajones sunt diferentes: sa velotzidade arta, su de colare àteras veturas in curva o in ue b’at istrìscia contìnua, sa pagu atentzione in un’iscuta o issa matessi cajonada dae s’assuntzione de alcol o droga, sa manu e sos ogros a su telefoneddu etc. Posca bi nd’at de natura prus istruturale cun rugradas a rasu, deviatziones, traballos sena concruos pro arrangiare e arràngios chi tardant a fàghere in ue s’asfaltu est oramai andadu, ausèntzia de una rete ferroviària pro minimare su pendolarismu privadu e su trasportu pesante, istradas provintziales sena corsias partzidas. Non faeddemus de sas persones investidas in tzitade atraessende istrìscias pedonales.

Custas noas (fintzas oe sos giornale sardos aberint sas editziones issoro cun contos, datos, fotografias) nche sunt in intro de sas medidas securitàrias aprontadas dae su Guvernu. Medidas chi in s’opinione pùblica est fàtzile a las ispainare ischende de collire cunsensu ca diant pàrrere de bonu sentidu: suspensione deretu de sa patente dae 15 dies a duos meses pro chie impreat su telefoneddu (dae unu a tres meses pro sos recaidos), contraventziones finas a 2.558 èuros e finas a 10 puntos in mancu (8 sa primu borta); controllos dae remotu pro chie non dat sa pretzedèntzia; prus autovelox; lìmite alcòlicu de 0,5 g/l, 0 pro sos recaidos e dispositivu alcol-lock obligatòriu pro custos pro chi sa màchina nemmancu movat si rilèvat alcol.

Salvini, chi est ministru de sas infrastruturas e chi duncas si devet interessare finas de comente sunt sas istradas nostras, giogat sa “carta” de sa repressione ebbia. Ma sena una campagna totale de informatzione e de educatzione custa dispositziones ant a èssere petzi cosas pro una narratzione eletorale. Cun sa patente a puntos e sas medidas atuales contra a chie guidat imbriagu ite amus otènnidu? E si custas non bastarent, penas galu prus graes? E finas a cando?