Tzentru manca e intòrrios 2 – LibeRU

Si Sardegna chiama Sardegna at a formalizare luego s’adesione a su tzentru manca cunforma a cantos e cales puntos de sos chimbe valutados dae sa coalitzione, LibeRU nch’est dae ora giai in intro e custu mangianu at torradu a pedire sas primàrias pro su sèberu de su candidadu a sa presidèntzia de sa Giunta. A bisu issoro est custa «una chistione democràtica dirimente, unu singiale forte de nch’imbiare a sa tzitadinàntzia sarda pro chi siat partètzipe in tempos tristos de astensionismu». Sa cosa est cherta, ma non diat pàrrere comente conditio sine qua non pro istare in intro de s’alleantzia, fintzas ca diat pàrrere prus chi no impòssibile, oramai, a bìdere àteras collocatziones dae parte de custu partidu. Annuntziada difatis sa presèntzia de una lista pròpia in intro de su tzentru manca «giughende a s’atentzione de sa coalitzione sos chi sunt sos temas prus de importu e caraterizantes pro unu partidu indipendentista»: lege proportzionale; referendum consultivu in contu de tzerachias militares; reconnoschimentu de sa natzione sarda; programmatzione de s’imparu de s’istòria e de sa limba in sas iscolas, s’ùrtima movende dae sa Lsc; assemblea costituente pro mudare s’istatutu e àteros temas che a su de sas rinnovàbiles. Su tzentru manca at a iscurtare finamentas cunforma a sos raportos de fortza chi nd’ant a essire a pìgiu dae sas eletziones, chi a su presente non ant partzimenta proportzionale e chi mantenent sa fòrmula aut simul stabunt aut simul cadent. Traduidu: «O custu o a domo».