Universidade de Tàtari: una Laurea Honoris causa a Edith Bruck

Aprofundimentu de su chenàbura - At a èssere un'addòbiu de importu, su chi s'at a isboligare in sos aposentos de s'Universidade de sos Istùdios de Tàtari su 28 de cabudanni chi at a bènnere. Faeddamus de sa “Laurea Honoris Causa” in Inscièntias filosòficas a unu nùmene importante de sa literadura internatzionale. 

Durante sa tzerimònia su Retore de s'ateneu tataresu Gavino Mariotti at a dàre sa laurea ad honorem a Edith Bruck, iscritora ungheresa famada chi est subravìvida a s'olocaustu. S'addòbiu est istadu presentadu su 12 de cabudanni in s'aposentu ed s'Universidade chi est dedicadu a Camillo Bellieni. Fiant presentes su Retore etotu, sa Diretora de su Dipartimentu de “Storia, Scienze dell’Uomo e della Formazione (DISSUF)” Valeria Panizza, sa Professora Gavina Cherchi e su Diretore generale de s'ateneu tataresu Giovanni Maria Soro.

S'idea de dare sa laurea honoris causa a Edith Bruck est nàschida in ocasione de sa partetzipatzione  de s'iscritora etotu a su Cunvegnu Internatzionale de su mese de làmpadas 2022 “Terra d’esilio, terra d’asilo. Gli ebrei in Sardegna”.

Non est totu. Tocat difatis a sutalineare ca pro pòdere leare parte a sa tzerimònia at a èssere netzessàriu s'invitu e finas ca s'apuntamentu at a èssere trasmitidu in su giassu internet de s'universidade tataresa. 

Sa tzerimònia at a èssere presèdida dae su Retore, dae sa Professora Valeria Panizza e dae su Professore Sebastiano Ghisu, Presidente de su Cursu de Istùdios in Inscièntias istòricas e filosòficas. Sa Professora de Estetica Gavina Cherchi at a curare sa “laudatio”. At a sighire sa “lectio magistralis” de Edith Bruck. Su tìtulu? “S'universidade mia? Sa vida”. 

At a leare parte a sa tzerimònia su coro de s'Universidade de Tàtari, dirigidu dae su maistru Fabio Fresi.

S'iniziativa est organizada paris cun s'assòtziu “Ammentos Archivio memorialistico della Sardegna”.