Universidade e sotziedade, duas dies de arresonos in Casteddu

Aprofundimentu de su mèrcuris - Sa de tres missiones de sos ateneos movende dae sos pianos istratègicos a s’impatu in sa sotziedade. Est dae custu meledu, chi in italianu torrat cun su tìtulu chi l’ant dadu, chi su 5 e su 6 de custu mese, in su palatzu de su Retoradu de s’Universidade de Casteddu ant a faeddare de istrategias, identidade e missione a un’ala, e de cunsighèntzias in su territòriu a s’àtera.

S’eventu est organizadu dae sa Crui, sa cunferèntzia italiana de sos retores in collaboratzione cun UniCa. «Su tema – leghimus in su situ de s’ateneu casteddaju – est de interessu semper prus mannu e nos imponet unu meledu in contu de punnas e vocatziones. S’assemblea Crui at a èssere ocasione pro nos cunfrontare e cumpartzire ideas in contu de polìticas de sa de tres missiones de sos ateneos faghende resumu de su ruolu e de su chi s’universidade ingendrat in s’economia, in sa cultura de sos territòrios e cunforma a sos grandes temas de sa sustenibilidade in lìnia cun sos obietivos de s’Agenda Onu 2030 e su Pnrr». In intro de s’addòbiu s’ant a intreverare boghes e prospetivas diferentes pro nche falare a fundu a sas fainas de sos ateneos. A concruos de custas duas dies s’ant a presentare finamentas unas cantas propostas in contu de denominatzione, mètricas de valutatzione e avaloramentu de sas atividades universitàrias formuladas dae una commissione de sa Crui. S’eventu s’at a pòdere bìdere via streaming intrende·nche a custu indiritzu.

Sas duas dies ant a comintzare a sas 15 de su 5 cun sos saludos istitutzionales e s’ant a isvilupare pro mèdiu de parlatas, mesas tundas e presentadas de propostas. A mesudie e mesu de su 6 sos concruos pro sestare unu bilantzu de su chi s’at naradu in antis. Sos addòbios los ant a fàghere in s’aula magna de Palatzu Belgrano, in carrera de s’Universidade 40